فرز الأخبار

ازاي تعرف مكان الحرائق الجارية في أي مكان في العالم؟ مع بداية موسم حصاد الرز في مصر، طبعًا متوقع نسمع عن حرايق قش الأرز ودخانه اللى بيغطي أماكن كتير، خاصة في الأقاليم. فيه أداة كويسة اسمها .، وهي عبارة عن خريطة حية بتعتمد على لقطات الأقمار الصناعية، زي اللى بتاخدها الأقمار التابعة لوكالة ناسا. ونقدر في أي وقت من خلالها نعرف أماكن حدوث الحرايق وإحداثياتها، وهي بتتحدث يوميًا. وكمان نقدر نعمل سيرش عن فترات سابقة، وإمكانيات أخرى متاحة عليها.

بناء سور بطول كورنيش الإسكندرية👀👀 كلام وصور كتير متداولة لبناء سور خرساني بطول كورنيش الإسكندرية، وفي انتقادات كتير وتخوفات من حجب رؤية البحر عن المواطنين. فيه فعلا مبنى عالي حاجب رؤية البحر، لكن مش بطول الكورنيش، ده لأحد المباني ضمن مشروع سياحي ترفيهي اسمه توليب سي سكوير بيقع على كورنيش مصطفى كامل، في منطقة سيدي جابر. بحسب كلام رئيس الإدارة المركزية للسياحة والمصايف بالإسكندرية اللواء أحمد حجازي، فطول المبنى ده 20 متر فقط، ومكانه أسفل كوبري مصطفى كامل. مشروع توليب سي سكوير أو توليب 2 تابع لـمجموعة توليب لإدارة الفنادق التابعة للقوات المسلحة. وتم بناءه تحت إشراف الهيئة الهندسية للقوات المسلحة، وتم اعتماد التصميمات التي قدمها المكتب الاستشاري من أساتذة التخطيط العمراني والهندسة بالكلية الفنية العسكرية. بحسب مجموعة توليب فالمشروع هو الأضخم سياحيًّا فى الإسكندرية، وهو عبارة عن منتجع سياحي ومجمع فندقي، بيقع على مساحة 20 ألف متر مربع، منها 2000 متر مربع فقط في البر، والباقي داخل البحر. وبيبعد عشرات الأمتار بس عن فندق توليب 1 اللي في منطقة رشدي الملاصقة لسيدي جابر. المشروع بيضم مطاعم، وكافيهات، وصالة تزحلق على الجليد، وبولينج، وجيم وأيروبكس، ومحال تجارية، وتراسات خارجية مفتوحة، وعرض الدولفين، ونفاورة راقصة، ومدرسة تعليم الغوص، وألعاب أطفال، ومسرح مكشوف، ومارينا للرحلات البحرية، وقاعة حفلات، وحديقة طيور ونباتات. في انتقادات كتير للمشروع لإنه أدى لأزمة مرورية لشهور في إسكندرية، وكمان لإنه بيحرم الناس من حقهم في شاطئ البحر. محافظة إسكندرية بتقول إن المشروع ده مهم وهيوفر 4 آلاف فرصة عمل للمواطنين، وكمان الجراج اللي اتبنى أسفل كوبري مصطفى كامل، في إطار المشروع، هتكون عوائده المالية خاصة بمحافظة الإسكندرية. النائب بالبرلمان عن محافظة الإسكندرية هيثم الحريري، قدم طلب إحاطة للبرلمان بخصوص المضروع بدعوى إنه بينتهك الدستور المصري اللي بيقول تلتزم الدولة بحماية بحارها وشواطئها وبحيراتها وممراتها المائية ومحمياتها الطبيعية. ويحظر التعدى عليها، أوتلويثها، أواستخدامها فيما يتنافى مع طبيعتها، وحق كل مواطن فى التمتع بها مكفول. كورنيش إسكندرية تعرض لعمليات حجب عن المواطنين في كتير من الأماكن لصالح الكافيهات والمشاريع الإستثمارية. إحنا مش بندافع عن المشروع ولا بنهاجمه، إحنا بنوض الحقايق المتاحة عنه لمواجهة الشائعات.

كلام كتير متداول وأسئلة كتير جت لنا عن صدور قرار بتخفيض الجمارك على السيارات، وإن ده هيؤدي إن أسعارها تنزل بقيمة 30 ألف جنيه. ده توضيح بحقيقة الموضوع. القرار الجديد بينص على إيه؟ يوم 12 سبتمبر، الرئيس عبد الفتاح السيسي أصدر القرار الجمهوري رقم 419 لسنة 2018، بتعديل التعريفة الجمركية لبعض السلع المستوردة، من ضمن السلع اللي تم تعديل تعريفتها الجمركية، هي السيارات الهجينة التي تعمل بمحركين كهرباء بنزين، والسيارات التي تعمل بالغاز الطبيعي، والسيارات الكهربائية. السيارات الملاكي الهجينة يعني اللي بتشتغل بالكهرباء والبنزين سعة 1600 سي سي، تم تخفيض جماركها من 40 إلى 30، والسيارات اللي سعتها أكثر من 1600 سي سي، تم تخفيض جماركها من 135 إلى 100 السيارات اللي بتعمل بالغاز الطبيعي، تم خفض رسومها الجمركية وبقت 35 بدل من 40. أما السيارات الكهربائية فهي معفاة تمامًا من الجمارك. وده للتشجيع على استخدام عربيان الطاقة النظيفة اللي مبتلوثش البيئة. هل القرار ده هيخفض أسعار السيارات كلها؟ في ناس اعتقدت إن القرارات دي هتأدي لتخفيض أسعار جميع أنواع السيارات، وده أدى لشلل وركود في سوق السيارات، بحسب تصريحات أشرف شرباص، نائب رئيس شعبة السيارات بالاتحاد العام للغرف التجارية. السيارات اللي أسعارها هتقل هي السيارات اللي تم تقليل جماركها بس، أما باقي أنواع السيارات فأسعارها هتفضل زي مهي لإن جماركها مقلتش. تقليل الجمارك على السيارات الكهربائية والهجينة مش هيستفيد منه ناس كتير لإن أسعار السيارات دي مرتفعة ومتناسبش شريحة كبيرة من السوق المصري. إلغاء الجمارك على السيارات الأوروبية في 2019. الجمارك على السيارات الأوروبية هتبقى صفر في عام 2019، ومش هيدفع عليها غير ضريبة القيمة المضافة فقط 14، وده بناء على اتفاقية الشراكة المصرية الأوروبية، اللي السيد نجم، رئيس مصلحة الجمارك، أكد التزام مصر بها. اتفاقية الشراكة المصرية الأوروبية دخلت حيز التنفيذ في 2004، وبمقتضاها المفروض يتم إعفاء السيارات الأوروبية من الرسوم الجمركية خلال 15 سنة، يعني في عام 2019. وده اللي أكد رئيس مصلحة الجمارك إنه هينفذ.

الرئيس عبد الفتاح السيسي صدق إمبارح على قانون حماية المستهلك الجديد وعشان هو بيمسنا كلنا بشكل مباشر ده ملخصه:✅✅ القانون بيلزم البائع بإعلام المستهلك بكافة البيانات الجوهرية عن المنتجات، وبالأخص مصدر المنتج وصفاته وخصائصه الأساسية وسعره، وإن كل البيانات دي تكون مكتوبة باللغة العربية بخط واضح. وهيعاقب اللي يمتنع عن ده بغرامة بين 10 آلاف و500 ألف جنيه. لازم البائع يقدم فاتورة للمستهلك، واللي يمتنع عن ده هيكون معرض لغرامة من 30 ألف لمليون جنيه. القانون بيحظر خداع المستهلك عن طريق إعطائه بيانات خاطئة عن السلعة ومواصفتها وسعرها ومدة صلاحيتها، واللي هيقوم بده هيكون معرض لغرامة من 50 ألف لـ2 مليون جنيه. القانون بيحظر حبس المنتجات الاستراتيجية المعدة للبيع عن التداول وذلك عن طريق إخفائها أو عدم طرحها للبيع أو الامتناع عن بيعها أو بأية صورة أخرى. وهيعاقب اللي يعمل كده بالحبس مدة لا تقل عن عام، وغرامة بين 100 ألف و2 مليون جنيه. للمستهلك الحق في استبدال السلعة أو إعادتها مع استرداد قيمتها خلال 14 يوم من الشراء دون إبداء أسباب. وله الحق في استبدالها أو إعادتها مع استرداد قيمتها خلال 30 يوم، لو كان فيها عيب أو مخالفة للمواصفات المتفق عليها. وهيعاقب اللي يمتنع عن ده بغرامة بين 10 آلاف و500 ألف جنيه. البائع ملتزم بإن ضمان السلع المعمرة، زي الأجهزة الكهربائية، ضد عيوب الصناعة ميقلش عن عامين من تاريخ استلام المستهلك للسلعة. يعني أقل ضمان للسلع دي لازم ميقلش عن سنتين. واللي يمتنع عن ده هيعاقب بغرامة بين 30 ألف ومليون جنيه. البائع ملتزم بإن الضمان يشمل أعمال الكشف والفحص والاصلاح وقطع الغيار الأصلية وتحمل نفقات انتقال الفنيين أو نقل المنتج من مقر المستهلك إلى مركز الصيانة للاصلاح وإعادته للمستهلك مرة أخرى. البيع عن بعد عن طريق الإنترنت أو التلفون مثلًا لازم يشمل توضيح ببيانات البائع الأساسية زي الاسم والعنوان والتلفون، وبيانات المنتج وثمنه، والمصاريف الإضافية زي مصاريف الشحن، والضمان، وتاريخ تسليم البضاعة. القانون بيلزم الشركات العقارية بمنع الإعلان أو الترويج عن مشروعاتها أو بيع الوحدات إلا بعد الحصول على رخصة البناء. واللي هيعمل ده هيكون معرض لغرامة بين 50 ألف و2 مليون جنيه. القانون بيلزم المورد باستبدال أي سلعة توجد فيها عيب جوهري تكرر مرتين خلال العام الأول من تاريخ الشراء، وذلك دون أي تكلفة على المستهلك. واللي يمتنع عن ده هيعاقب بغرامة بين 30 ألف ومليون جنيه. طبعا الكلام اللي فوق ده كله جميل، ومهم لينا كمستهلكين ، لكن مرتبط دايما بوجود رقابة على الأسواق ومتابعة لشكاوى الناس.

أحيانا بندور على الأماكن القريبة من مكاننا، مثلا لو بندور على محطات الوقود أو بنفكر في نطلب أكل أو نروح مطعم قريب مننا. ليه منجمعش الأماكن دي في قايمة واحدة عشان نعرف فين مكانها ونفاضل بينها وناخد قرارنا. ده مثال بسيط للي ممكن تقوم بيه أداة ، وهي أداة بسيطة من خلالها بنملا خانات موجودة على موقع الأداة، زي إننا نحدد خطوط الطول والعرض ومساحة دايرة البحث اللى بندور فيها عن الأماكن مثلا 500 متر أو أكثر وبعدين بيظهر في أسفل الأداة قائمة للأماكن اللى بندور عليها مع رابط ينقلك لعنوانها على خرائط جوجل. أهمية الأداة دي مش بس في قصة البحث عن المطاعم، لكن مهمة خاصة للصحفيين في وقت الأحداث العاجلة أو الكبيرة، زي لو كان فيه صور متداولة عن حادث كبير في مكان ما، زي حريق في محطة وقود، ممكن من خلال الأداة نعرف جميع محطات الوقود اللى موجود في نطاق وسط القاهرة مثلا، فمن وقتها نقارن بين الأشياء اللى ظاهرة في الصورة المتداولة ونتائج البحث عن محطات الوقود اللى أظهرتها الأداة على خرائط جوجل اللي بتحتفظ بصور أرشيفية غالبًا للأماكن عشان نعرف بسرعة فين مكان المحطة وهكذا. طب إزاي أقدر أجيب خطوط الطول والعرض لمنطقة معينة؟ ببساطة افتح خرائط جوجل، وبتعمل زووم إن على المكان اللي بتدور فيه وبتضغط كليك يمين، ومن الخيارات هتضغط على خيار ماذا يوجد هنا أو ?، بعدها هيظهر لك الخريطة اسم المكان لو كان مشهور أو مُحددة عليها، وتحتها هتلقى أرقام، هي دي إحداثيات خطوط الطول والعرض المقصودة اللى بينهم فاصلة زي كده 30.044407 31.235615 هتعمل كوبي لكل جزء من الإحداثيات وتحطه في الخانة المخصصة لخطوط الطول والعرض على الأداة، وتكمل بقية عملية السيرش. على الأداة شرح تفصيلي أكتر لكيفية استخدام الأداة ويفضل لو تستخدم اللغة المحلية للبلد أو المكان عشان تحصل على نتائج أفضل.

أحيانا بنبقى عاوزين نبحث عن فيديوهات على يوتيوب في فترة زمنية مُحددة، وكمان بنبقى عاوزين ده من مكان محدد بعينه مش مجرد سيرش عام ممكن نتوه في نتايجه، وأحيانا ده بيسبب لنا إحباط لأننا مش عارفين نلقى اللي بندور عليه بسهولة. عشان كده أداة ، متقسمة بشكل بسيط سهل الاستخدام. في يمين موقع الأداة فيه 3 تقسيمات رئيسية، يعني ممكن تبحث عن شىء حسب المكان أو قناة معينة موجودة على يوتيوب حابب تشوف أرشيفها في وقت معين في بالك، أو حسب الموضوع اللى بتدور عليه نفسه. بجانب خريطة في واجهة موقع الأداة بتستعرض لك النتائج، فمثلا كمان لو اخترت تعمل تسيرش حسب المكان حتى لو كان اسم ضاحية أو شارع في مدينة، هتلقى تقسيمات فرعية، زي إنك تحدد اسم المكان بالظبط، ونطاق البحث اللى بتدور فيه دايرة قطرها كام كيلومتر، اسم الشىء اللي بتدور عليه، والبحث عن النتائج سواء من حيث ترتيبا الزمني ولا عدد المشاهدات ولا أكثر تفاعلا معها. وممكن تختار إذا كنت عاوز تبحث عن شىء خلال آخر 24 ساعة بس ولا حابب تختار مدة زمنية تحددها بنفسك. وكمان تقدر تحدد عدد صفحات النتائج اللى عاوزها تظهر لك في موقع الأداة من تحت. وفيه خاصية السيرش المتقدم اللى بيتيح لك تبحث عن فيديوهات مثلا بجودة عالية أو الفيديوهات اللى متصنفة كمشاع إبداعي بحيث تقدر تستخدمها في أي منتج ليك أو اللى كانت عبارة عن فيديوهات بث مباشر لحدث حي.