فرز الأخبار

وصلنا أسئلة كتير عن مدى صحة الكلام عن انقطاع الإنترنت النهاردة 11 أكتوبر 2018 في مصر والعالم كله، وهنا نحب نوضح التالي: الكلام ده مش حقيقي، الإنترنت مش هيقطع عن العالم كله، اللي هيحصل إنه هيبقي فيه هناك انقطاعات أو صعوبة يواجهها بعض مستخدمي الإنترنت في التصفح، لكن نطاق التأثر بده لا يتعدى 1 من المستخدمين في العالم كله، بينما 99 هيكون في مقدورهم التصفح عادي، حسب منظمة آيكان المسؤولة والمعنية عن نطاقات الإنترنت. الكلام ده أعلنته المنظمة في 22 أغسطس الماضي، وقالت إن الانقطاعات وصعوبة التصفح هتأثر فقط على 36 مليون مستخدم حول العالم، ولم تحدد منطقة معينة قد تتضرر. وأشارت إلى أن الخلل ده هيستمر لمدة 48 ساعة. آيكان أوضحت إن سبب الانقطاعات هو قيامها بتغيير مفاتيح التشفير اللي بتساعد على حماية نظام أسماء النطاقات على الإنترنت . وكمان نشرت دليل لإخبار الناس بالتأثيرات المتوقعة وازي يتعاملوا معاها. القصة نالت اهتمام صحف مصرية كتير واللي كمان وضحة حقيقة انقطاع الإنترنت في العالم، ونشرت توضيحات لمسؤولين وخبراء.

حوار مجلة مصر للطيران حورس مع الفنانة الأمريكية درو باريمور🤔😎 خلال الساعات اللي فاتت انتشر أخبار وبوستات عن قيام مجلة حورس، التابعة لشركة مصر للطيران، بـفبركة حوار مع الفنانة الأمريكية درو باريمور، وإن ده فضيحة دولية لمصر خصوصًا بعد نفي المتحدث باسم باريمور اجرائها للحوار، ونشر الخبر في وسائل إعلام عالمية زي هافنغتون بوست وترافيل إنسايدر وغيرهم للموضوع. الموضوع بدأ بإن كاتب ومحلل سياسي اسمه آدم بارون، كان مسافر على خطوط مصر للطيران، وقرأ الحوار في مجلة حورس فشك فيه بسبب لغته السيئة وأخطائه الإملائية ولإن صعب إن باريمور تقول الكلام المكتوب في الحوار، وصور الحوار ونشره على تويتر ووصفه بإنه سيريالي. الغريب في الحوار كانت صياغته ونوعية الأسئلة، مقدمته على سبيل المثال كانتمن المعروف أن باريمور كان لديها أكثر من 17 علاقة وخطبة وزواج، ويعتقد علماء النفس أن سلوكها هذا يعد طبيعيا لأنها افتقدت دور الرجل القدوة في حياتها بعد انفصال والديها عندما كان عمرها تسع سنوات فقط، منذ ذلك الحين سعت باريمور لا إراديا للحصول على الاهتمام والرعاية من الرجال في حياتها، لكن للأسف لم تمض الأمور كما خططت دائما، وحتى الآن لم تنجح في أي علاقة لأسباب مختلفة. ناس كتير شاركت صور الحوار وتغريدة بارون، والموضوع وصل لفريق عمل باريمور، والمتحدث باسمها نفى لموقع هافنغتون بوست إجراء الفنانة أي حوار مع مجلة حورس، وقال إنهم بيتواصلوا مع شركة مصر للطيران بخصوص الموضوع. صحفي في بي بي سي نشر تغريدة على تويتر منشن فيها مصر للطيران، وبيطلب منهم توضيح إزاي ينشروا حاجة مفبركة بالشكل ده، وحساب مصر للطيران رد عليه وقال: المقابلة أجرتها الدكتورة عايدة تيكلا الرئيس السابق لرابطة هوليود للصحافة الأجنبية وأحد أعضاء التصويت في غولدن غلوب. إحنا كمان بعتنا لمصر للطيران وردوا علينا أكدوا صحة إجراء الحوار، ونفوا إنه حوار مفبرك. الصحفية عايدة تيكلا كتبت في حسابها على تويتر إنها بالفعل أجرت الحوار ده مع باريمور في نيويورك، وإن الحوار صحيح تمامًا ومش. وأضافت إنها شغالة في مصر مع مجلتي حورس ونص الدنيا وبتنتج لهم مواد صحفية، وإن المجلات دي من حقها تعديل محتوى الحوار المنشور بما يتفق مع رؤيتهما وسياستهما التحريرية وبما لا يخل بسياق المعلومات الواردة به. في ناس شككت في صحة التويتات دي وفي صحة الحساب، فخرجت عايدة تيكلا في فيديو مصور، نشرته أمل فوزي رئيس تحرير مجلة “حورس”، وأكدت نفس الكلام اللي قالته في التويتات، وقالت إن حوار درو تم في اللقاء الصحفي اللي أجرته الممثلة في نيويورك مع أعضاء جمعية الكتاب والنقاد الأجانب بهوليود. تيكلا كمان بررت، في اتصال هاتفي مع بي بي سي، الضجة اللي عملها الحوار بإنه تحفظ من قبل الممثلة وطاقم عملها على طريقة صياغة مقدمة الحوار المترجم عن الإنجليزية في المجلة. إلى الآن لم يصدر تعليق جديد من فريق عمل باريمور على رد مصر للطيران والصحفية عايدة تيكلا.

حقيقة تصويت مدربي وكباتن المنتخبات العربية لمحمد صلاح كلام كتير منتشر عن ترشيحات الدول العربية لجائزة أفضل لاعب في العالم اللي بتقدمها فيفا، وكلام متداول كمان عن إن مدرب منتخب مصر ماخترش صلاح كاخيتار أول في المرشحين. هنا بنقدم قايمة باختيارات الدول العربية للاعب الأفضل في العالم. المدرب الحالي لمنتخب مصر خفير أجيري اختار صلاح طبعًا، لكن المدرب السابق هيكتور كوبر اختار ميسي، حسب إعلان الفيفا. فيفا اختارت 15 دولة عربية يصوت مدربيها وكباتنها لاختيار اللاعب الأفضل، واختارت 19 صحفي وإعلامي من دول عربية يصوتوا في الجائزة. كل مدرب أو كابتن منتخب أو إعلامي بيختار 3 لاعبين، الأول 5 نقط، والتاني 3 نقط، والتالت 1 نقطة. من بين ال١٥ دولة مفيش غير كباتن منتخب فلسطين وسوريا وموريتانيا اللي اختارو صلاح كاختيار أول، بالإضافة لعصام الحضري كابتن منتخب مصر. في المدربين مفيش غير مدرب البحرين فقط اللي اختار صلاح في المرتبة الأولى. إحنا مرتبين الاختيارات من اليمين للشمال عشان الناس متوهش.

بناء سور بطول كورنيش الإسكندرية👀👀 كلام وصور كتير متداولة لبناء سور خرساني بطول كورنيش الإسكندرية، وفي انتقادات كتير وتخوفات من حجب رؤية البحر عن المواطنين. فيه فعلا مبنى عالي حاجب رؤية البحر، لكن مش بطول الكورنيش، ده لأحد المباني ضمن مشروع سياحي ترفيهي اسمه توليب سي سكوير بيقع على كورنيش مصطفى كامل، في منطقة سيدي جابر. بحسب كلام رئيس الإدارة المركزية للسياحة والمصايف بالإسكندرية اللواء أحمد حجازي، فطول المبنى ده 20 متر فقط، ومكانه أسفل كوبري مصطفى كامل. مشروع توليب سي سكوير أو توليب 2 تابع لـمجموعة توليب لإدارة الفنادق التابعة للقوات المسلحة. وتم بناءه تحت إشراف الهيئة الهندسية للقوات المسلحة، وتم اعتماد التصميمات التي قدمها المكتب الاستشاري من أساتذة التخطيط العمراني والهندسة بالكلية الفنية العسكرية. بحسب مجموعة توليب فالمشروع هو الأضخم سياحيًّا فى الإسكندرية، وهو عبارة عن منتجع سياحي ومجمع فندقي، بيقع على مساحة 20 ألف متر مربع، منها 2000 متر مربع فقط في البر، والباقي داخل البحر. وبيبعد عشرات الأمتار بس عن فندق توليب 1 اللي في منطقة رشدي الملاصقة لسيدي جابر. المشروع بيضم مطاعم، وكافيهات، وصالة تزحلق على الجليد، وبولينج، وجيم وأيروبكس، ومحال تجارية، وتراسات خارجية مفتوحة، وعرض الدولفين، ونفاورة راقصة، ومدرسة تعليم الغوص، وألعاب أطفال، ومسرح مكشوف، ومارينا للرحلات البحرية، وقاعة حفلات، وحديقة طيور ونباتات. في انتقادات كتير للمشروع لإنه أدى لأزمة مرورية لشهور في إسكندرية، وكمان لإنه بيحرم الناس من حقهم في شاطئ البحر. محافظة إسكندرية بتقول إن المشروع ده مهم وهيوفر 4 آلاف فرصة عمل للمواطنين، وكمان الجراج اللي اتبنى أسفل كوبري مصطفى كامل، في إطار المشروع، هتكون عوائده المالية خاصة بمحافظة الإسكندرية. النائب بالبرلمان عن محافظة الإسكندرية هيثم الحريري، قدم طلب إحاطة للبرلمان بخصوص المضروع بدعوى إنه بينتهك الدستور المصري اللي بيقول تلتزم الدولة بحماية بحارها وشواطئها وبحيراتها وممراتها المائية ومحمياتها الطبيعية. ويحظر التعدى عليها، أوتلويثها، أواستخدامها فيما يتنافى مع طبيعتها، وحق كل مواطن فى التمتع بها مكفول. كورنيش إسكندرية تعرض لعمليات حجب عن المواطنين في كتير من الأماكن لصالح الكافيهات والمشاريع الإستثمارية. إحنا مش بندافع عن المشروع ولا بنهاجمه، إحنا بنوض الحقايق المتاحة عنه لمواجهة الشائعات.

كلام كتير متداول وأسئلة كتير جت لنا عن صدور قرار بتخفيض الجمارك على السيارات، وإن ده هيؤدي إن أسعارها تنزل بقيمة 30 ألف جنيه. ده توضيح بحقيقة الموضوع. القرار الجديد بينص على إيه؟ يوم 12 سبتمبر، الرئيس عبد الفتاح السيسي أصدر القرار الجمهوري رقم 419 لسنة 2018، بتعديل التعريفة الجمركية لبعض السلع المستوردة، من ضمن السلع اللي تم تعديل تعريفتها الجمركية، هي السيارات الهجينة التي تعمل بمحركين كهرباء بنزين، والسيارات التي تعمل بالغاز الطبيعي، والسيارات الكهربائية. السيارات الملاكي الهجينة يعني اللي بتشتغل بالكهرباء والبنزين سعة 1600 سي سي، تم تخفيض جماركها من 40 إلى 30، والسيارات اللي سعتها أكثر من 1600 سي سي، تم تخفيض جماركها من 135 إلى 100 السيارات اللي بتعمل بالغاز الطبيعي، تم خفض رسومها الجمركية وبقت 35 بدل من 40. أما السيارات الكهربائية فهي معفاة تمامًا من الجمارك. وده للتشجيع على استخدام عربيان الطاقة النظيفة اللي مبتلوثش البيئة. هل القرار ده هيخفض أسعار السيارات كلها؟ في ناس اعتقدت إن القرارات دي هتأدي لتخفيض أسعار جميع أنواع السيارات، وده أدى لشلل وركود في سوق السيارات، بحسب تصريحات أشرف شرباص، نائب رئيس شعبة السيارات بالاتحاد العام للغرف التجارية. السيارات اللي أسعارها هتقل هي السيارات اللي تم تقليل جماركها بس، أما باقي أنواع السيارات فأسعارها هتفضل زي مهي لإن جماركها مقلتش. تقليل الجمارك على السيارات الكهربائية والهجينة مش هيستفيد منه ناس كتير لإن أسعار السيارات دي مرتفعة ومتناسبش شريحة كبيرة من السوق المصري. إلغاء الجمارك على السيارات الأوروبية في 2019. الجمارك على السيارات الأوروبية هتبقى صفر في عام 2019، ومش هيدفع عليها غير ضريبة القيمة المضافة فقط 14، وده بناء على اتفاقية الشراكة المصرية الأوروبية، اللي السيد نجم، رئيس مصلحة الجمارك، أكد التزام مصر بها. اتفاقية الشراكة المصرية الأوروبية دخلت حيز التنفيذ في 2004، وبمقتضاها المفروض يتم إعفاء السيارات الأوروبية من الرسوم الجمركية خلال 15 سنة، يعني في عام 2019. وده اللي أكد رئيس مصلحة الجمارك إنه هينفذ.

الرئيس عبد الفتاح السيسي صدق إمبارح على قانون حماية المستهلك الجديد وعشان هو بيمسنا كلنا بشكل مباشر ده ملخصه:✅✅ القانون بيلزم البائع بإعلام المستهلك بكافة البيانات الجوهرية عن المنتجات، وبالأخص مصدر المنتج وصفاته وخصائصه الأساسية وسعره، وإن كل البيانات دي تكون مكتوبة باللغة العربية بخط واضح. وهيعاقب اللي يمتنع عن ده بغرامة بين 10 آلاف و500 ألف جنيه. لازم البائع يقدم فاتورة للمستهلك، واللي يمتنع عن ده هيكون معرض لغرامة من 30 ألف لمليون جنيه. القانون بيحظر خداع المستهلك عن طريق إعطائه بيانات خاطئة عن السلعة ومواصفتها وسعرها ومدة صلاحيتها، واللي هيقوم بده هيكون معرض لغرامة من 50 ألف لـ2 مليون جنيه. القانون بيحظر حبس المنتجات الاستراتيجية المعدة للبيع عن التداول وذلك عن طريق إخفائها أو عدم طرحها للبيع أو الامتناع عن بيعها أو بأية صورة أخرى. وهيعاقب اللي يعمل كده بالحبس مدة لا تقل عن عام، وغرامة بين 100 ألف و2 مليون جنيه. للمستهلك الحق في استبدال السلعة أو إعادتها مع استرداد قيمتها خلال 14 يوم من الشراء دون إبداء أسباب. وله الحق في استبدالها أو إعادتها مع استرداد قيمتها خلال 30 يوم، لو كان فيها عيب أو مخالفة للمواصفات المتفق عليها. وهيعاقب اللي يمتنع عن ده بغرامة بين 10 آلاف و500 ألف جنيه. البائع ملتزم بإن ضمان السلع المعمرة، زي الأجهزة الكهربائية، ضد عيوب الصناعة ميقلش عن عامين من تاريخ استلام المستهلك للسلعة. يعني أقل ضمان للسلع دي لازم ميقلش عن سنتين. واللي يمتنع عن ده هيعاقب بغرامة بين 30 ألف ومليون جنيه. البائع ملتزم بإن الضمان يشمل أعمال الكشف والفحص والاصلاح وقطع الغيار الأصلية وتحمل نفقات انتقال الفنيين أو نقل المنتج من مقر المستهلك إلى مركز الصيانة للاصلاح وإعادته للمستهلك مرة أخرى. البيع عن بعد عن طريق الإنترنت أو التلفون مثلًا لازم يشمل توضيح ببيانات البائع الأساسية زي الاسم والعنوان والتلفون، وبيانات المنتج وثمنه، والمصاريف الإضافية زي مصاريف الشحن، والضمان، وتاريخ تسليم البضاعة. القانون بيلزم الشركات العقارية بمنع الإعلان أو الترويج عن مشروعاتها أو بيع الوحدات إلا بعد الحصول على رخصة البناء. واللي هيعمل ده هيكون معرض لغرامة بين 50 ألف و2 مليون جنيه. القانون بيلزم المورد باستبدال أي سلعة توجد فيها عيب جوهري تكرر مرتين خلال العام الأول من تاريخ الشراء، وذلك دون أي تكلفة على المستهلك. واللي يمتنع عن ده هيعاقب بغرامة بين 30 ألف ومليون جنيه. طبعا الكلام اللي فوق ده كله جميل، ومهم لينا كمستهلكين ، لكن مرتبط دايما بوجود رقابة على الأسواق ومتابعة لشكاوى الناس.