دحض الإدعاء

الكلام ده غير صحيح. مفيش أي قرارات جديدة بخصوص تربية واصطحاب الكلاب.✅✅

– كل الحكاية إنه من كام يوم عضو مجلس النواب الدكتور إسماعيل نصر الدين، أعلن إنه بيعد مشروع قانون يجرم حيازة الكلاب دون ترخيص من وزارة الداخلية، وبشروط لن تقل عن شروط تراخيص حمل السلاح. لكن إلى الآن مشروع القانون لم يعد ولم يقدم للبرلمان.

– المفروض عشان تمتلك كلب بطريقة شرعية، فإنت محتاج تاخد ترخيص. الترخيص ده عبارة عن حلقة معدنية بتتعلق في طوق على رقبة الكلب لإثبات إنه واخد كل التطعيمات الخاصة به بشكل كامل، وأهمها تطعيم السعار. وممكن الحصول عليه من مديريات الطب البيطري بعد إثبات تعاطي الكلب لتطعيماته، ومقابل رسوم 50 جنيه.

– القانون في مصر لا يعاقب على امتلاك كلب غير مرخص إلا في حالة ارتكابه جريمة، هنا صاحب الكلب أو الحارس بتاعه بيعاقب قانونيًا بالتبعية. المادة 176 من القانون المدني بتقول: “حارس الحيوان، ولو لم يكن مالكاً له، مسئول عما يحدثه الحيوان من ضرر، ولو ضل الحيوان أو تسرب، ما لم يثبت الحارس أن وقوع الحادث كان بسبب أجنبي لا يد له فيه”.

– على سبيل المثال، لو صاحب الكلب استخدمه في القتل بيعاقب على أنه “قاتل متعمد”، وإذا استخدمه في إرهاب مواطن وسرقة أمواله فيحاكم بعقوبة السرقة بالإكراه المقترنة بالإرهاب والتي تصل إلى المؤبد، كمان لو أهملت في تربية الكلب وعض حد وأصابه بجروح فإنت بتتحاكم على ارتكاب جنحة والعقوبة ممكن توصل لحبس 3 سنين.

– استخراج الترخيص له مميزات إنه بيأكد تحصين الكلب من السعار والأمراض التانية وبالتالي لو عض صاحبه أو أي شخص مبتكونش فيها مشكلة كبيرة أوي زي لو مش مطعم. كمان الترخيص بيديك الحق في الحصول على تعويض لو حد اعتدى على الكلب بتاعك، أو لو اتقتل من أي شخص أو من دوريات الشرطة اللي بتنزل من وقت للتاني تقتل الكلاب الضالة.