دحض الإدعاء

بتوصلنا من فترة استفسارات عن ميعاد زيادة أسعار البنزين والغاز ونسب الزيادة دي، وكنا منتظرين صدور القرار بشكل رسمي عشان نوضحه.

الحكومة أعلنت زيادة أسعار البنزين بكافة أنواعه والسولار والغاز والمازوت. والزيادة بدأت تطبق من النهارده السبت، رغم إن القرار تاريخ صدوره من 10 أيام.

**الأسعار ونسب الزيادة كام؟

نسب الزيادة بتتراوح ما بين 17.4% إلى 66.5%، حسب نوع المنتج البترولي:

– السولار: ارتفع من 3.65 جنية للتر إلى 5.5، بنسبة زيادة 50%
– بنزين 80: ارتفع من 3.65 جنيه للتر إلى 5.5، بنسبة زيادة 50%.
– بنزين 92: ارتفع من 5 جنيه للتر إلى 6.75 جنيه للتر، بنسبة زيادة حوالي 35%.
– بنزين 95: ارتفع من 6.60 جنيه للتر إلى 7.75 جنيه، بنسبة زيادة 17.4%.
– غاز تموين السيارات: ارتفع من 2 جنيه للمتر إلى 2.75، بنسبة زيادة 37.5%.
– أنبوبة الغاز المنزلي: ارتفع من 30 جنيه إلى 50 جنيه، بنسبة زيادة حوالي 66.5%.
– أنبوبة الغاز التجاري: ارتفع من 60 جنيه إلى 100 جنيه، بنسبة زيادة حوالي 66.5%.
– المازوت لقمائن الطوب والقطاعات الصناعية الأخرى (باستثناء الصناعات الغذائية والأسمنت والكهرباء): ارتفع من 2100 جنيه للطن إلى 3500 جنيه، بنسبة زيادة 66.7%.

*هل دي آخر زيادة هتحصل؟

دي الزيادة الثالثة من وقت تحرير سعر صرف الجنيه في 3 نوفمبر 2016، ضمن برنامج الحصول على قرض الـ12 مليار دولار من صندوق النقد الدولي، وللأسف دي مش أخر زيادة، ومتوقع تحصل زيادة كمان السنة الجاية زي اليومين دول برضوا. خطة الحكومة هي التخلص من دعم الوقود بحلول سنة 2019. بمعنى إن الوقود سعره يبقي حر، يتحدد كل شهر سعر مختلف حسب أسعار البترول في العالم.

*تأثيرات الزيادة دي علينا ايه؟
كل حاجة هتزيد أسعارها، زي ما هو معروف، زيادة أسعار الوقود بيتبعها زيادة في أسعار كل شئ من مواصلات عامة، مواد غذائية ومواد بناء بسبب ارتفاع تكاليف النقل لكل المنتجات. كمان ارتفاع سعر طن المازوت هيؤدي إلى زيادة كبيرة في سعر الطوب.
على سبيل المثال اللي عنده عربية ملاكي وكان بيفولها بنزين 92 بـ 200 جنيه هتبقى دلوقتي التفويله (40 ليتر) بـ 275 جنيه.