-كلام كتير منتشر من امبارح، مصدره خبر من موقع اسمه "MotorsPlus.com"، عن صدور قرار حكومي برفع الدعم بشكل نهائي عن بنزين 95 من أول شهر يناير الجاي. وإن من هنا ورايح هيتم تشكيل لجنة لتحديد السعر كل شهر حسب سعر البترول وسعر الصرف والتكاليف الأخرى. - الحكومة نفت بشكل قاطع صدور أي قرار جديد خاص بسعر البنزين، سواء 95 أو غيره. وبتأكد إن الأسعار مستمرة كما هي حاليًا ومفيش نية لتغييرها مطلع السنة الجديدة. - لكن نفي الحكومة لرفع سعر الوقود في يناير الجاي، لا ينفي إن هيتم رفع أسعار الوقود السنة الجاية مع بداية العام المالي الجديد (يوليو 2019)، وده بموجب اتفاق وتعهد الحكومة لصندوق النقد الدولي مقابل قرض الـ12 مليار دولار. ** إزي هيتم حساب السعر بعد تحريره؟ - مش معروف إلى الآن إزاي هيتم حساب سعر البنزين بعد رفع الدعم نهائي عنه، لكن المتوقع إن السعر هيتحدد بشكل شهري أو أسبوعي، بحيث يراعي أسعار النفط العالمية وسعر الدولار مقابل الجنيه وتكاليف النقل والخدمة، زي ما بيحصل في الإمارات على سبيل المثال، إن فيه لجنة حكومية بتحدد كل شهر سعر بيع المواد البترولية وتعلن الأسعار على موقع وزارة الطاقة. - سعر البترول بيتغير بشكل شبه يومي بحسب الأوضاع السياسية والاقتصادية في العالم، وبحسب حجم المعروض في السوق. السعر حاليًا حوالي 60 دولار للبرميل، وده سعر كويس جدًا لمصر اللي عامله حسابها في موازنة 2018/ 2019 على 67 دولار للبرميل. لكن للأسف السعر مرجح للصعود بداية العام الجاي بسبب اتفاق عالمي بين منتجي النفط على تخفيض الإنتاج بمقدار 1.2 مليون برميل، وده هيأدي لارتفاع الأسعار. وكالة بلومبيرغ الاقتصادية بتقول إن السعر ممكن يبقى بين 70 و80 دولار للبرميل. - زيادة سعر النفط عالميًا عن حسابات الحكومة في الموازنة (67 دولار للبرميل)، هو اللي بيدفع بعض المحللين إلى توقع إن الحكومة هترفع سعر البنزين أكتر من مرة خلال 2019، عشان تحقق مستهدفات الموازنة وتخفض عجزها. لكن حتى الآن بحسب الكلام الرسمي مفيش نية لرفع سعر البنزين سوى على بداية العام المالي الجديد في يوليو 2019، طبقًا للخطة المعلنة واتفاق الحكومة مع صندوق النقد الدولي.