مجتمع التحقق العربي
هو منظمة بحثية غير ربحية معنية بدراسة الأخبار الزائفة والمعلومات المضللة باللغة العربية على الانترنت، وتقديم الحلول الرائدة والمبتكرة لرصدها
من هو سفانتي بابو الفائز بجائزة نوبل في الطب؟
Oct. 04, 2022
(تحقيق- الحقيقة فين- اعرف- سين وجيم- تقارير- علشان محدش يضحك عليك- مدونة- والمواد المتشابهة في المنصات الشريكة)
دحض الإدعاء
- كل سنة في شهر أكتوبر بتعلن جمعية نوبل في معهد كارولينسكا في السويد عن الفائزين بجوائز نوبل في الطب والفيزياء والكيمياء والأدب.
- امبارح، أعلنت الجمعية عن الفائز بجائزة نوبل في الطب لعام 2022، وهو عالم الجينات السويدي سفانتي بابو (67 سنة) لاكتشافاته عن (جينومات أشباه البشر المنقرضة والتطور البشري) واللي وصفتها الجمعية بإنها "مهمة كانت تبدو مستحيلة".
- سافنتي بابو اتولد سنة 1955، ودرس تخصصين في جامعة أوبلاست في السويد. التخصص الأول كان في العلوم الإنسانية ودرس فيها تاريخ العلوم وعلم المصريات والآثار، ودا لأنه كان نفسه من وهو طفل يكون عالم آثار ويكتشف مومياوات، لكن بابو غير مساره واتجه لدراسة الطب عشان يدرس علم الأحياء ويبقى زي والده (سوني برغستروم) اللي كان دكتور في الكيمياء الحيوية ونال جائزة نوبل في الطب سنة 1982.
- اهتمام سفانتي بعلم المصريات وعلوم الخلية والجينات أنتج أبحاث ساهمت في ظهور فرع جديد للعلوم اسمه علم "الجينومات القديمة paleogenomics"، وهو دراسة الجينات على العظام والحفريات، وبابو أحد مؤسسي هذا الفرع من العلوم، ونشر حوالي 350 بحث.
- هنحاول نشرح بطريقة سهلة "بابو" عمل ايه عشان يحصل على الجايزة الكبيرة دي واللي قيمتها تقريبًا 900 ألف دولار، وهنعرف يعني إيه المصطلح دا "جينومات أشباه البشر المنقرضة".
# الإنسان العاقل وإنسان نياندرتال
- الأبحاث السابقة قدمت دليلًا على أن الإنسان الحديث العاقل -اللي هو احنا- ظهر لأول مرة في إفريقيا من حوالي 300 ألف سنة، في حين أن أقرب أقربائنا (أشباه البشر أو الإنسان البدائي) واللي اسمه إنسان نياندرتال (اُكتشفت عظامه في وادي نياندرتال في ألمانيا)، كان عايش في أوروبا وغرب آسيا من حوالي 400 ألف سنة لحد 30 ألف سنة فاتت ومن وقتها انقرض.
- من حوالي 70 ألف سنة، هاجرت مجموعات من الإنسان العاقل من إفريقيا إلى الشرق الأوسط، ومن هناك انتشروا إلى بقية العالم. ودا معناه إن الإنسان العاقل تعايش مع إنسان نياندرتال لمدة 20 ألف سنة على الأقل.
- عشان نعرف علاقتنا بالإنسان البدائي المنقرض (النياندرتال) لازم نعمل لبقاياه العظمية تحليل الحمض النووي DNA (الجينوم) زي ما بيحصل في قضايا إثبات النسب كدا، ونقارن بين الجينات بتاعتنا وبتاعتهم هل هي متشابهة ولا لأ.
- دا اللي عمله بابو وأخد نوبل عليه، إنه قدر يوصل لجينومات الإنسان البدائي المنقرض أو (جينومات أشباه البشر المنقرضة).
# ليه وصفت جمعية نوبل إنجاز "بابو" بـ"المهمة المستحيلة"؟
- الحمض النووي لعينات العظام اللي اكتشفوها لإنسان النياندرتال كان قليل جدًا وملوث بالحمض النووي للبكتيريا المتراكمة عليه، غير إنه بيبقى عليه حمض نووي للباحثين اللي بيتعاملوا معاه.
- لكن بابو لم يستسلم وبدأ في تطوير طرق يقدر من خلالها يعرف الحمض النووي لإنسان نياندرتال، وطبعا الشغل دا استمر سنين طويلة.
- وفعلا نشر بابو أول بحث عن جينوم إنسان نياندرتال في عام 2010. وأظهرت التحليلات إن أحدث سلف مشترك لإنسان نياندرتال والإنسان العاقل عاش منذ حوالي 800 ألف سنة.
- قدر بابو وفريقه يوصلوا للعلاقة بين إنسان نياندرتال وبشر العصر الحديث من أجزاء مختلفة من العالم. أظهرت التحليلات المقارنة إن الحمض النووي لإنسان نياندرتال كانت أكثر تشابهًا مع البشر المعاصرين الذين نشأوا في أوروبا أو آسيا أكثر من البشر المعاصرين القادمين من إفريقيا.
- دا معناه إن النياندرتال والإنسان العاقل تزاوجوا خلال آلاف السنين من التعايش. وفي البشر المعاصرين من أصل أوروبي أو آسيوي، موجود عندهم 1-4٪ تقريبًا من الحمض النووي لإنسان نياندرتال.
# اكتشاف آخر لبابو وفريقه (إنسان دينيسوفا)
- في سنة 2008، اكتُشف جزء من عظم إصبع عمره 40 ألف عام في كهف دينيسوفا في الجزء الجنوبي من سيبيريا، وعشان كدا بقى اسمه (إنسان دينيسوفا). وهو برضو إنسان بدائي أو شبيه بالبشر ولحسن الحظ احتوى عظم الإصبع على حمض نووي محفوظ جيدًا بصورة استثنائية، عكس إنسان نياندرتال.
- اشتغل بابو وفريقه على الحمض النووي لإنسان دينيسوفا، وأظهروا نتايج أحدثت ضجة علمية، لإن نتايج الحمض النووي لدينيسوفا كانت مختلفة عن إنسان نياندرتال والإنسان الحالي.
- الأبحاث استمرت، واكتشف العلماء إنه حصل انتقال لجينات إنسان دينيسوفا للإنسان المعاصر، حيث وجدوا أن السكان في جنوب شرق آسيا يحملون ما يصل إلى 6 ٪ من الحمض النووي للدينيسوفا.
# طيب إيه أهمية الاكتشاف دا، هنستفاد منه إيه؟
- بفضل اكتشافات سافنتي بابو، قدرنا نفهم دلوقتي إن جينات أقاربنا المنقرضين تؤثر على فسيولوجيا (وظائف الأعضاء والأجهزة الحيوية) البشر في الوقت الحاضر.
- يعني مثلًا في جينات في دينيسوفا تمنح القدرة على العيش على ارتفاعات عالية، وهي ميزة شائعة بين سكان منطقة التبت في الوقت الحاضر.
- وأيضًا تؤثر جينات الإنسان البدائي على استجابتنا المناعية لأنواع مختلفة من العدوى.
# ليه الإنسان المعاصر فريد ومميز عن إنسان نياندرتال وإنسان دينيسوفا؟
- الإنسان المعاصر عنده قدرة على إنشاء ثقافات معقدة وابتكارات متقدمة وفنون تصويرية، فضلاً عن قدرته على عبور المياه المفتوحة والانتقال إلى جميع أنحاء كوكبنا .
- إنسان نياندرتال وإنسان دينيسوفا عاشوا في مجموعات واستخدموا أيضًا أدوات، لكنها كانت بدائية جدًا ولم تتطور إلا قليلًا خلال مئات الآلاف من السنين.
- الاختلافات الجينية بين الإنسان العاقل وأقاربنا المنقرضين كانت غير معروفة لحد ما أبحاث بابو وفريقه حلت اللغز دا. والبحث المستمر المكثف على تحليل الاختلافات بينا وبينهم هيوصلنا للإجابة عن السؤال دا "لماذا الإنسان المعاصر فريد ومميز؟"، بحسب بيان جمعية نوبل.
آخر الأخبار
