فرز الأخبار

خبر متداول بشكل كبير، مصدره موقع اسمه صحيفة الحدث الإخبارية، بيقول إنه الملك سلمان يأمر بإعفاء تركي آل الشيخ من جميع مناصبه.

في الأيام الأخيرة، حصلت صورة على أكتر من 200 ألف ريكاشن وتفاعل، الصورة بتظهر أسد وفيل ماشيين جنب بعض والفيل شايل شبل الأسد على خرطومه أو زلومته بسبب تعبه نتيجة ارتفاع درجات الحرارة. ورغم عدم منطقية الصورة لكنها انتشرت بكثافة كبيرة.

بناء سور بطول كورنيش الإسكندرية👀👀 كلام وصور كتير متداولة لبناء سور خرساني بطول كورنيش الإسكندرية، وفي انتقادات كتير وتخوفات من حجب رؤية البحر عن المواطنين. فيه فعلا مبنى عالي حاجب رؤية البحر، لكن مش بطول الكورنيش، ده لأحد المباني ضمن مشروع سياحي ترفيهي اسمه توليب سي سكوير بيقع على كورنيش مصطفى كامل، في منطقة سيدي جابر. بحسب كلام رئيس الإدارة المركزية للسياحة والمصايف بالإسكندرية اللواء أحمد حجازي، فطول المبنى ده 20 متر فقط، ومكانه أسفل كوبري مصطفى كامل. مشروع توليب سي سكوير أو توليب 2 تابع لـمجموعة توليب لإدارة الفنادق التابعة للقوات المسلحة. وتم بناءه تحت إشراف الهيئة الهندسية للقوات المسلحة، وتم اعتماد التصميمات التي قدمها المكتب الاستشاري من أساتذة التخطيط العمراني والهندسة بالكلية الفنية العسكرية. بحسب مجموعة توليب فالمشروع هو الأضخم سياحيًّا فى الإسكندرية، وهو عبارة عن منتجع سياحي ومجمع فندقي، بيقع على مساحة 20 ألف متر مربع، منها 2000 متر مربع فقط في البر، والباقي داخل البحر. وبيبعد عشرات الأمتار بس عن فندق توليب 1 اللي في منطقة رشدي الملاصقة لسيدي جابر. المشروع بيضم مطاعم، وكافيهات، وصالة تزحلق على الجليد، وبولينج، وجيم وأيروبكس، ومحال تجارية، وتراسات خارجية مفتوحة، وعرض الدولفين، ونفاورة راقصة، ومدرسة تعليم الغوص، وألعاب أطفال، ومسرح مكشوف، ومارينا للرحلات البحرية، وقاعة حفلات، وحديقة طيور ونباتات. في انتقادات كتير للمشروع لإنه أدى لأزمة مرورية لشهور في إسكندرية، وكمان لإنه بيحرم الناس من حقهم في شاطئ البحر. محافظة إسكندرية بتقول إن المشروع ده مهم وهيوفر 4 آلاف فرصة عمل للمواطنين، وكمان الجراج اللي اتبنى أسفل كوبري مصطفى كامل، في إطار المشروع، هتكون عوائده المالية خاصة بمحافظة الإسكندرية. النائب بالبرلمان عن محافظة الإسكندرية هيثم الحريري، قدم طلب إحاطة للبرلمان بخصوص المضروع بدعوى إنه بينتهك الدستور المصري اللي بيقول تلتزم الدولة بحماية بحارها وشواطئها وبحيراتها وممراتها المائية ومحمياتها الطبيعية. ويحظر التعدى عليها، أوتلويثها، أواستخدامها فيما يتنافى مع طبيعتها، وحق كل مواطن فى التمتع بها مكفول. كورنيش إسكندرية تعرض لعمليات حجب عن المواطنين في كتير من الأماكن لصالح الكافيهات والمشاريع الإستثمارية. إحنا مش بندافع عن المشروع ولا بنهاجمه، إحنا بنوض الحقايق المتاحة عنه لمواجهة الشائعات.

كلام كتير متداول وأسئلة كتير جت لنا عن صدور قرار بتخفيض الجمارك على السيارات، وإن ده هيؤدي إن أسعارها تنزل بقيمة 30 ألف جنيه. ده توضيح بحقيقة الموضوع. القرار الجديد بينص على إيه؟ يوم 12 سبتمبر، الرئيس عبد الفتاح السيسي أصدر القرار الجمهوري رقم 419 لسنة 2018، بتعديل التعريفة الجمركية لبعض السلع المستوردة، من ضمن السلع اللي تم تعديل تعريفتها الجمركية، هي السيارات الهجينة التي تعمل بمحركين كهرباء بنزين، والسيارات التي تعمل بالغاز الطبيعي، والسيارات الكهربائية. السيارات الملاكي الهجينة يعني اللي بتشتغل بالكهرباء والبنزين سعة 1600 سي سي، تم تخفيض جماركها من 40 إلى 30، والسيارات اللي سعتها أكثر من 1600 سي سي، تم تخفيض جماركها من 135 إلى 100 السيارات اللي بتعمل بالغاز الطبيعي، تم خفض رسومها الجمركية وبقت 35 بدل من 40. أما السيارات الكهربائية فهي معفاة تمامًا من الجمارك. وده للتشجيع على استخدام عربيان الطاقة النظيفة اللي مبتلوثش البيئة. هل القرار ده هيخفض أسعار السيارات كلها؟ في ناس اعتقدت إن القرارات دي هتأدي لتخفيض أسعار جميع أنواع السيارات، وده أدى لشلل وركود في سوق السيارات، بحسب تصريحات أشرف شرباص، نائب رئيس شعبة السيارات بالاتحاد العام للغرف التجارية. السيارات اللي أسعارها هتقل هي السيارات اللي تم تقليل جماركها بس، أما باقي أنواع السيارات فأسعارها هتفضل زي مهي لإن جماركها مقلتش. تقليل الجمارك على السيارات الكهربائية والهجينة مش هيستفيد منه ناس كتير لإن أسعار السيارات دي مرتفعة ومتناسبش شريحة كبيرة من السوق المصري. إلغاء الجمارك على السيارات الأوروبية في 2019. الجمارك على السيارات الأوروبية هتبقى صفر في عام 2019، ومش هيدفع عليها غير ضريبة القيمة المضافة فقط 14، وده بناء على اتفاقية الشراكة المصرية الأوروبية، اللي السيد نجم، رئيس مصلحة الجمارك، أكد التزام مصر بها. اتفاقية الشراكة المصرية الأوروبية دخلت حيز التنفيذ في 2004، وبمقتضاها المفروض يتم إعفاء السيارات الأوروبية من الرسوم الجمركية خلال 15 سنة، يعني في عام 2019. وده اللي أكد رئيس مصلحة الجمارك إنه هينفذ.

من ساعات صفحة سيناء 24 على فيس بوك نشرت مقطع فيديو قصير على اعتبار إنه أول تعليق من السيسي على انقطاع الكهرباء 3 أيام في العريش.

معظم الصحف المصرية، زي اليوم السابع والمصري اليوم والتحرير و البوابة والشروق مسحت الخبر، نشروا خبر بيقول إن رئيس المكسيك أعلن إفلاس بلاده.