فرز الأخبار

كلام كتير منتشر من امبارح، مصدره خبر من موقع اسمه .، عن صدور قرار حكومي برفع الدعم بشكل نهائي عن بنزين 95 من أول شهر يناير الجاي. وإن من هنا ورايح هيتم تشكيل لجنة لتحديد السعر كل شهر حسب سعر البترول وسعر الصرف والتكاليف الأخرى. الحكومة نفت بشكل قاطع صدور أي قرار جديد خاص بسعر البنزين، سواء 95 أو غيره. وبتأكد إن الأسعار مستمرة كما هي حاليًا ومفيش نية لتغييرها مطلع السنة الجديدة. لكن نفي الحكومة لرفع سعر الوقود في يناير الجاي، لا ينفي إن هيتم رفع أسعار الوقود السنة الجاية مع بداية العام المالي الجديد يوليو 2019، وده بموجب اتفاق وتعهد الحكومة لصندوق النقد الدولي مقابل قرض الـ12 مليار دولار. إزي هيتم حساب السعر بعد تحريره؟ مش معروف إلى الآن إزاي هيتم حساب سعر البنزين بعد رفع الدعم نهائي عنه، لكن المتوقع إن السعر هيتحدد بشكل شهري أو أسبوعي، بحيث يراعي أسعار النفط العالمية وسعر الدولار مقابل الجنيه وتكاليف النقل والخدمة، زي ما بيحصل في الإمارات على سبيل المثال، إن فيه لجنة حكومية بتحدد كل شهر سعر بيع المواد البترولية وتعلن الأسعار على موقع وزارة الطاقة. سعر البترول بيتغير بشكل شبه يومي بحسب الأوضاع السياسية والاقتصادية في العالم، وبحسب حجم المعروض في السوق. السعر حاليًا حوالي 60 دولار للبرميل، وده سعر كويس جدًا لمصر اللي عامله حسابها في موازنة 2018 2019 على 67 دولار للبرميل. لكن للأسف السعر مرجح للصعود بداية العام الجاي بسبب اتفاق عالمي بين منتجي النفط على تخفيض الإنتاج بمقدار 1.2 مليون برميل، وده هيأدي لارتفاع الأسعار. وكالة بلومبيرغ الاقتصادية بتقول إن السعر ممكن يبقى بين 70 و80 دولار للبرميل. زيادة سعر النفط عالميًا عن حسابات الحكومة في الموازنة 67 دولار للبرميل، هو اللي بيدفع بعض المحللين إلى توقع إن الحكومة هترفع سعر البنزين أكتر من مرة خلال 2019، عشان تحقق مستهدفات الموازنة وتخفض عجزها. لكن حتى الآن بحسب الكلام الرسمي مفيش نية لرفع سعر البنزين سوى على بداية العام المالي الجديد في يوليو 2019، طبقًا للخطة المعلنة واتفاق الحكومة مع صندوق النقد الدولي.

كلام كتير ما زال منتشر عن استحواذ شركة موانئ دبي الإماراتية على 49 من محور قناة السويس وكمان بعض البوستات المنتشرة بتقول الإمارات هتاخد 49 من دخل قناة السويس.

صفحة الجزيرة مصر الموثقة على فيسبوك، الجزيرة مصر التابع لقناة الجزيرة نشرت خبر بيقول موانئ دبي تستحوذ على 49 من محور قناة السويس المتحدث باسم مجلس الوزراء نادر سعد يقول بمداخلة تلفزيونية إن شركة موانئ دبي الإماراتية ستوقع اتفاق شراكة مع هيئة قناة السويس للاستحواذ على 49 من مشروع تطوير محور القناة الاقتصادي.

وصلنا أسئلة كتير عن الكلام المتداول عن نية الحكومة إلغاء بنزين 80 والاستعاضة عنه ببنزين 87، فإيه القصة دي ووصلت لفين؟ إيه أصل الموضوع؟ إلغاء بنزين 80 ده موضوع مش جديد. دي فكرة بيتم طرحها من سنة 2012، وكان الكلام وقتها على إلغاء بنزين 80 و استحداث نوع جديد اسمه بنزين 85. الكلام في الموضوع بدأ يتزايد من شهر يونيو اللي فات، وبقى في تصريحات رسمية من المسؤولين إن في نية لإلغاء بنزين 8 و استحداث نوع جديد اسمه بنزين87. مع أول اجتماع لحكومة الدكتور مصطفى مدبولي، في 20 يونيو 2018، تم اتخاذ القرار، وتبقى تحديد ميعاد التنفيذ وسعر النوع الجديد. إيه مميزات بنزين 87؟ حسب كلام الحكومة، بنزين 87 يتميز بأن نسبة الأوكتان فيه أعلى من الموجودة في 80، وده بيحافظ على قوة محرك العربية وبيزيد في عمره مقارنة بـ80، وكمان بيقلل من استهلاك البنزين، وتغيير زيت العربية. ميزة بنزين 87 كمان إنه بيسبب انبعاثات كربون أقل من بنزين 80، وبالتالي يحافظ على البيئة أكتر. هل دي أسباب تغيير نوع البنزين بس؟ الحكومة بتعتقد إن إلغاء بنزين 80 واستحداث 87 هيوفر بعض الدعم الموجه للوقود يبلغ في موازنة العام المالي الحالي 89 مليار جنيه، وده لإن بنزين 80 هو الأكثر استهلاكًا في مصر والأكثر حصولًا على دعم، وبالتالي إلغاءه وإحلال نوع جديد بمواصفات وجودة وسعر أعلى هيكون سبب في خفض الاستهلاك وبالتالي توفير جزء من الدعم. مفيش دراسات معلنة إلى الآن عن حجم الوفر في الدعم اللي يسببه إلغاء 80 واستحداث 87. إيه العربيات اللي ممكن تستخدم بنزين 87؟ طبعًا العربيات اللي شغالة ببنزين 80 مش هيكون قدامها غير بنزين 87، لكن بالنسبة للعربيات اللي شغالة ببنزين 92 هيفضل 92 أفضل لها. البنزين الجديد ممكن يشتغل على السيارات من الموديلات المتوسطة اللي تستخدم بنزين 92، والسيارات الصينية كمان، ولكن كفاءة 92 أفضل. إيه السعر المقترح للنوع الجديد؟ مفيش تصريحات رسمية بخصوص سعر بنزين 87، وكل المسؤولين يرددون أن الموضوع ما زال قيد الدراسة. التصريحات الغير رسمية بتقول إن الأكيد هو إن سعر بنزين 87 هيكون أعلى من 80، والبعض بيتوقع إن سعر 87 هيتراوح بين 6.25 جنيه و6.75 جنيه للتر الواحد، مقابل 5.5 جنيه للتر بنزين 80. إيه أضرار ده على المواطنين؟ سعر بنزين 87 سيكون أعلى من 80، وبالتالي ده هيرفع أسعار أغلب وسائل المواصلات في مصر، وكمان أسعار السلع هتتأثر لإن تكلفة نقلها هتكون أعلى. ده لما يضاف للزيادة الجديدة المتوقعة في أسعار الوقود في بداية العام المالي القادم بحسب اتفاق الحكومة مع صندوق النقد الدولي، هيعني أن أسعار الوقود هتعلى بشكل كبير، وهتأثر على أسعار كل السلع والخدمات. امتى هيتم طرح النوع الجديد؟ إلى الآن مفيش تحديد للموعد النهائي لطرح المنتج. وزارة البترول، بتقول إن لسه حتى الآن لطرح هذا النوع الجديد من البنزين، وأن الوزارة لم تنته حتى الآن من دراسة طرح هذا المنتج الجديد وأنه بمجرد الانتهاء من هذه الدراسة وتحديد مواصفات البنزين الجديد من قبل هيئة التوحيد القياسي سيتم الإعلان عن ذلك بكل شفافية للرأي العام.

خلال الكام يوم اللي فاتوا، انتشر كلام كتير عن وجود توجه من الدولة لزيادة أسعار تذاكر المترو، وإن سعر التذكرة ممكن يوصل 16 جنيه.👀👀 إيه بداية الموضوع؟ مع بدء اختبارات التشغيل للمرحلة الرابعة من خط المترو الثالث، بتبدأ من محطة الأهرام وحتى محطة نادي الشمس، وزير النقل هشام عرفات قال إن التذكرة أم 7 جنيه ما زالت مدعمة بـ9 جنيه الخط الأول لم يخضع لصيانة حقيقة لمدة 30 عامًا ويحتاج الآن لـ30 مليار جنيه لتطويره زيادة التذاكر محل دراسة مش هنثبت على رقم لمدة 12 سنة. التغيير بيبقى شديد على المواطنين، والمواطنين تعبوا معانا وهما عارفين أهمية مترو الأنفاق، ولا بد أن نحافظ على استدامة هذه الخدمة. كمان نائب وزير النقل عمرو شعث، قال إن القيمة الحقيقية لتذكرة المترو أم 7 جنيه 16 جنيه و44 قرش، وإن الدولة هتظل تدعم المترو لإنه مرفق خدمي يعتمد بشكل أساسي على دعم الدولة، وإنهم مش عاوزين ياخدوا كامل الفرق بس لازم يقللوه، عشان كده كل سنة هتتم مراجعة أسعار التذاكر، وفي دراسات حالية لزيادتها. الوزير ظهر تاني، في تصريحات تلفزيونية، ونفى زيادة أسعار تذاكر مترو الأنفاق للخط الأول والثاني وقال إنها ثابتة مش هتتغير حاليًا في المرحلة دي، وقال إنه بيتم دراسة زيادة سعر تذاكر الخط الثالث، لكن إلى الآن لم يتم تحديد الزيادة. هل سعر التذكرة فعلًا 16 جنيه؟ في شهر ديسمبر اللي فات، وزير النقل هشام عرفات قال، في برنامج العاشرة مساء، إن التكلفة الحقيقية لتذكرة المترو من 8 إلى 10 جنيه، وحاليًا بيقول إن تكلفتها أكتر من 16، يعني التكلفة الحقيقية للتذكرة ارتفعت أقل حاجة 60 خلال حوالي 10 شهور، بدون توضيح لسبب الارتفاع ده. البرلمان بيقول إيه؟ الكلام عن زيادة أسعار التذاكر اتقابل برفض واسع من نواب البرلمان. على سبيل المثال وكيل لجنة النقل والمواصلات النائب محمد عبد الله زين الدين، قال إن كلام مجرد تصريحات لا ترقى لمستوى قرار، وإن عمليه الزيادة لن تتم فى الوقت الحالي لأن أى محاولة لذلك ستقابل بالرفض . النائب عمرو الجوهرى عضو اللجنة الاقتصادية بالبرلمان، رفض تصريحات الوزير، إن هذا المقترح مرفوض، خاصة أن الحكومة سبق ورفعت التذاكر مرتين فيما سبق، مشيرًا إلى أن الخسائر التى تكبدها المرفق ناتجة عن سوء الإدارة لذلك يجب ألا يتحملها المواطن.

صور متداولة بشكل كبير لعملات من فئة 500 و1000 جنيه، ومكتوب تعليق عليهم: شكرا للبنك المركزي المصري ع حل أكبر مشاكلي أخيرا الواحد هيعرف يعيش.