مجتمع التحقق العربي
هو منظمة بحثية غير ربحية معنية بدراسة الأخبار الزائفة والمعلومات المضللة باللغة العربية على الانترنت، وتقديم الحلول الرائدة والمبتكرة لرصدها
حقيقة بيع قطعة آثار مصرية لعرضها في مطعم الشيف بوراك
Apr. 01, 2021
تتضمن (زائف- مفبرك- بوست غير صحيح- خبر غير صحيح- تصريح غير دقيق- تصريح كاذب- صورة مزيفة- مضلل- فيديو مضلل- بوست مضلل- خبر مضلل- عنوان مضلل)
- صور منتشرة بشكل كبير جدًا لتمثال مذهب وحقائب فلوس، مع تعليق: "تم بيع قطعة اثار مصرية لرجل الاعمال عبد الله الجداوي 😍 بمبلغ 57,000,000 مليون جنيه عشان يعرضها في أحد مطاعم الشيف بوراك في تركيا.. مبروووك يا صديقي ❤️❤️".
دحض الإدعاء
– الكلام ده غير صحيح. ده تمثال تقليد، مش قطعة آثار. والموضوع دعاية لشركة تسويق واعلانات.✅✅
# ليه دي قصة مفبركة؟
– أولًا: مفيش رجل أعمال معروف اسمه عبد الله الجداوي، سواء في مصر أو خارج مصر. ومن الطبيعي لو رجل أعمال قادر يشتري تمثال بـ57 مليون جنيه هيكون اسمه معروف.✅✅
– ثانيًا: شركة “main sponsor” اللي اسمها موجود على الصور هي شركة دعايا وإعلان، ونشرت فيديو على صفحتها من زيارة بعض العاملين فيها لمطعم الشيف بوراك في تركيا، وقدمت له التمثال اللي في الصور بدون أن تقول إنه تمثال أثري ولا تقول إن تم شرائه بـ57 مليون جنيه.✅✅
– ثالثًا: في الفيديو اللي نشرته “main sponsor” بيتم التعامل مع التمثال بإهمال، لدرجة إن الحربة اللي في إيده وقعت، فقام أحد الأشخاص بإعادتها مرة أخرى بشكل عادي. وطبيعي محدش يتعامل بالشكل ده لو التمثال ده حقيقي والسعر المذكور في البوست.✅✅
– رابعًا: مجدي شاكر كبير الأثريين بوزارة الآثار، في تصريحات خاصة لـ “القاهرة 24″، نفى إن التمثال ده يكون أثري وأكد إنه تمثال خشب مطلي بمادة تشبه الذهب، ولكنه غير حقيقي وحديث الصنع.✅✅
* أول من نشر البوست ده هو شخص اسمه “محمود بدري”، بيتم استضافته في القنوات التلفزيونية باعتباره “أغنى شاب في مصر”، وبعد انتشار البوست قام بتعديل التعليق وكتب بدل إن دي قطعة أثرية مصرية “رجل الأعمال عبد الله الجداوي يشتري قطعة ذهب بمبلغ 57,000,000 مليون جنيه ويهديها للشيف بوراك عشان يعرضها في احد المطاعم في تركيا”، مع هاشتاج #mainsponsor، في حركة للترويج للشركة.✅✅
آخر الأخبار
