---

دحض الإدعاء

1- هو إيه أساسا نظام البابل شيت؟ "البابل شيت" يعني الإجابة عبر خاصية الاختيار من متعدد وتظليل الإجابة الصحيحة أو وضع علامة صح داخل دائرة الإجابة الصحيحة. 2- شكل الأسئلة هيبقى عامل إزاي السنة دي ؟ - في الامتحان، الطالب هيستلم ورقتين: ورقة الأسئلة وورقة تانية للإجابة، هيقرأ السؤال في ورقة الأسئلة والاختيار بين 4 اختيارات (أ ، ب ، ج ، د) في ورقة الإجابة. - الإجابة باستخدام القلم الجاف الأزرق، ويجاوب إما بتظليل الإجابة أو وضع علامة صح داخل الدائرة. - أسئلة السنة دي هتبقى من نوعية الاختيار المتعدد، ومفيش أى نوع من الاسئلة المقالية حتى في فرع التعبير في اللغة العربية، هتبقى اختيار من متعدد. 3- هل تم إلغاء التعبير والقصة من امتحان اللغة العربية عشان الامتحان بالاختيار من متعدد؟ - لا.. وده خبر غير دقيق انتشر في مايو اللي فات، ونفاه وزير التربية والتعليم طارق شوقي، وامتحان التعبير هيكون موجود في امتحان اللغة العربية بطريقة الاختيار من متعدد. - نشرت جريدة الوطن طريقة إجراء الامتحان التعبير باستخدام الخيار بين متعدد على لسان أشرف الممتاز أستاذ اللغة العربية اللي قال: "مش هيتخصص صفحات لكتابة موضوع التعبير في امتحان اللغة العربية، ولكن الطالب هيظلل محل الكتابة، مثلا اختيار علامة ترقيم معينة يحل محل رسمها بالقلم، والإجابة باختيار نوع جملة معينة سواء كانت (برقية أو لافتة) يحل محل كتابتها بخط اليد". 4 - هل الامتحان "اختياري" ما بين التابلت فقط أو عن طريق البابل شيت فقط؟ - لا.. الحل بالطريقتين (إجباري) ودي شائعة انتشرت برده الشهر اللي فات وخرجت وزارة التعليم ونفتها، وقالت الحل في الامتحان بالطريقتين وده مش اختياري بل "إجباري". - الطالب هيحل الأسئلة على ورقة البابل شيت الأول عشان ده الأهم، بعدها هيرصد نفس الإجابات والاختيارات دى على التابلت. - وده عشان يبقى فيه ضمان بوجود نسخة ورقية إضافية للإجابات لو سيستم التابلت تعرض لعطل أو حصل مثلا انقطاع للكهرباء خلال الامتحان، أو سقوط لسيستم الامتحانات في أي لجنة. 5- المفروض الطالب يحل ايه الأول ولو ملحقش يحل على التابلت ايه الموقف؟ - من حق الطالب الحصول على وقت إضافي لإتمام عملية الحل على البابل شيت والتابلت معًا، ولو حصل أى طارئ داخل اللجنة في وقت الامتحان يكتفي بتدوين الإجابات في ورقة البابل شيت. 6- طيب لو فيه طالب مستلمش التابلت على مدار السنة.. موقفه إيه من الامتحانات؟ - في فئات مستثناة من نقل الإجابات على التابلت وهم: *الطلاب الراسبين من السنة اللى فاتت. * طلاب المنازل. * طلاب تعطل التابلت الخاص بهم خلال الشهور الأخيرة قبل الامتحان. ** دول هيبقى امتحانهم بابل شيت "ورقي" فقط. 7- هل ممنوع على الطلاب استخدام الكتاب المدرسي في الامتحان؟ - لا.. مسموح باستخدامه، ودي كانت إشاعة ظهرت من أيام، وأصدرت الوزارة نفي لمنعها دخول الطلاب بالكتاب، وأكدت على أنها هتسمح بدخول الامتحانات النهائية بالكتاب المدرسي. - لكن غير مسموح للطالب باصطحاب أي أوراق خارجية أو ملازم أو نوت بوك أو أي شيء آخر غير الكتاب المدرسي. ** وفيه بعض كتب المدرسة غير مسموح باصطحابها زي: - في مادة اللغة العربية ممنوع أن الطالب ياخد معاه كتاب القصة المدرسية وفقط مسموح له اصطحاب كتاب المادة الأصلية للغة العربية. - كمان في مادة اللغة الإنجليزية غير مسموح أنه ياخد معاه كتاب القصة المدرسية باللغة الإنجليزية. 8- طب إيه الموقف حالة عدم تسليم الطالب لورقة الأسئلة أو وورقة الإجابة "البابل شيت" في نهاية الامتحان؟ ** لو الطالب رفض تسليم ورقة الأسئلة وورقة البابل شيت هيحرر المراقب محضر بالواقعة داخل اللجنة ويعتبر الطالب راسب فى تلك المادة، حتى لو قام بحل الإجابات نفسها على التابلت. 9- ماذا لو الطالب اختار الإجابة إجابة مختلفة في ورقة البابل شيت عن الإجابة اللي على جهاز التابلت؟ ** اختيار الطالب لأكثر من بديل للسؤال الواحد يفقده درجة السؤال، ويجب على الطالب تسجيل نفس الإجابة فى البابل شيت والتابلت. 10- تصحيح الامتحان بشكل البابل شيت هيبقى إزاي؟ - تصحيح الإجابات هيتم بشكل إلكتروني وبدون تدخل عنصر بشري. - الوزارة شكلت لجنة من المستشارين لكل مادة لوضع الإجابات الصحيحة للامتحانات. - والإجابات دي هتسجل على ماكينة تصحيح الإجابات عشان يتم إقرارها في البابل شيت. ** لو عندك أي سؤال عن امتحانات الثانوية العامة ابعتلنا على رسائل الصفحة أو الإيميل: ================== ومدققو "صحيح مصر"هيدوروا على الإجابة الدقيقة والصحيحة وهيرد عليك.