دحض الإدعاء

– الكلام ده أغلبه غير صحيح.✅✅
– السليم من البوستات دي هيا معلومة إن الرئيسة سافرت في طيران “إيكونومي” رخيص زي أي مواطن ومستخدمتش طائرة رئاسية، وقالت كمان انها عايزة تشجع زي أي مواطن، وده كان موقف ايجابي حظي باشادة كبيرة، لكن باقي التفاصيل اللي انتشرت حول الموقف المحترم ده هيا اللي غلط.
– طائرة الرئاسة الكرواتية متباعتش ولا حاجة، رغم إنها قديمة شوية (من سنة 1997) بحسب الموقع الرسمي للحكومة الكرواتية.

– كرواتيا دولة برلمانية، وبالتالي السلطات الأكبر فيها بإيد رئيس الوزراء مش رئيس الجمهورية، وأي نجاح أو فشل اقتصادي فيها بيكون المسؤول عنه رئيس الوزراء.✅✅

– منصب رئيس الجمهورية في كرواتيا هو منصب سلطته بشكل أساسي على الجيش وبعض الشؤون الخارجية. وبالتالي كوليندا متقدرش تاخد قرارات متعلقة بالاقتصاد أو تخفيض أجور أو عدم اقتراض، لأن فيه برلمان وحكومة.

– رئيس وزراء كرواتيا من 2016 هو أندريه بلينكوفيتش، وهو رئيس حزب الاتحاد الديمقراطي الكرواتي المحافظ اللي بتنتمي له رئيسة الجمهورية كوليندا. وفاز بالانتخابات بعد منافسة شرسة مع الحزب الاشتراكي الديمقراطي.

– اقتصاد كرواتيا مش من أكبر اقتصادات أوروبا، ورغم انتعاشه في الفترة الحالية مقارنة بحالة الركود اللي كان فيها من سنة 2009 إلى 2015، إلا إن الاقتصاد ما زال متعثر ومرجعش لقوته السابقة.

– بحسب البنك الدولي، نسبة البطالة في كرواتيا 11%، ونسبة بطالة الشباب 33٪ ودي نسبة مرتفعة في بلد عدد سكانه حوالي 4 مليون.
– كمان معدل الفقر في كرواتيا وصل لـ 5.1٪ في عام 2017، مقارنة بـ4.7٪ في عام 2009.
ومعدل النمو في 2017 بيصل إلى 2.8 ٪ ومتوقع إنه يقل تاني في 2018 إلى 2.6%، والدين الخارجي حوالي 84.2٪ من الناتج المحلي الإجمالي. آه المؤشرات دي تحسنت عن الوضع في وقت الركود، لكن التحسن مش كبير وميخليش حد يقول إن الاقتصاد الكرواتي من أكبر الاقتصاديات في أوروبا.

– البنك الدولي بيقول عن الاقتصاد الكرواتي: “تراجعت المخاطر السلبية ولكن لا تزال موجودة… إن المستوى المرتفع للدين العام يجعل كرواتيا عرضة لصدمات أسعار الفائدة وتفاقم ظروف التمويل الخارجي… آفاق كرواتيا في تجديد التقارب الحقيقي وتعزيز النمو الشامل ضعيفة”.

مفيش أي خبر بيتكلم عن خفض رواتب الوزراء والمسؤولين في كرواتيا، لكن بشكل عام الرواتب هناك ضعيفة مقارنة بباقي دول أوروبا، فعلى سبيل المثال راتب رئيسة كرواتيا كوليندا 3276 يورو، وده راتب متواضع.