دحض الإدعاء

– الكلام ده مش حقيقي، والتلفزيون الألماني مقالش كده، ومفيش ماتشات هتتعاد.✅✅

-إلى الآن لم يثبت تعاطي لاعبى المنتخب الروسي المنشطات، وأن الموضوع كله شكوك لم يتم التحقيق فيها إلى الآن.✅✅

– الموضوع بدأ لما تلفزيون “ARD” الألماني نشر تقرير يوم 18 يونيو الجاري، نقل فيه تصريحات لجريجورى رودكينكوف، الرئيس السابق لمختبر مراقبة تعاطي المنشطات في موسكو، واللي بيعيش حاليًا في مكان سري بأمريكا، قال فيها إن التحاليل اللي عملها لاعب المنتخب الروسي رسلان كامبولوف قبل المونديال بفترة أثبتت أنه بيتعاطى منشطات، لكن الحكومة الروسية تدخلت وبدلت العينات، وبعد لما الموضوع اتعرف تم استبعاد كامبولوف من المنتخب بداعي تعرضه للإصابة. ومش مستبعد إن ده يكون اتعمل مع لاعيبة تانية في المنتخب.

– كمان التقرير قال إن في مؤشرات قوية على وجود تلاعب في العينات اللي اتخدت من لاعبي المنتخب الروسي في كأس العالم 2014.

تقرير “ARD” ده، خلى صحف تشكك في نتيجة مباراة السعودية مع روسيا واللي خسر فيها السعودية 5 -0، وتعتقد إن ممكن السعودية تاخد نقط المباراة. ولما منتخب مصر اتهزم 3-1 من روسيا، الكلام تكرر تاني.

– اتهامات رياضيون روس بتناول منشطات قديمة، وأهمها كان بعد أولمبياد سوتشي 2014، اتوجه اتهام رسمي لوزارة الرياضة ومكتب الأمن الفيدرالي الروسي بإدارة والإشراف على التلاعب في نتائج تحاليل المنشطات لعدد من اللاعبين الروس باستبدال العينات الخاصة بتحاليلهم. وده اتسبب في حرمان أكثر من 100 رياضي روسي من المشاركة في دورة الألعاب الأولمبية اللي اتعملت في ريو دي جانيرو 2016.