دحض الإدعاء

– كلام كتير منتشر حول قرار شركة جوجل بوقف التعامل مع شركة هواوي Huawei Mobile، وبالتالي حرمان هواوي من تحديث نظام أندرويد Android@ اللي موبايلاتها شغالة به، وتأثيرات ده على الناس اللي معاها موبايلات هواوي. فخلينا نشوف مع بعض إيه الحكاية.⬇️⬇️

*إيه اللي حصل؟
-أمريكا وضعت شركة هواوي الصينية في “القائمة السوداء” للكيانات اللي بيحظر بيع أو نقل التقنية الأمريكية إليها دون موافقة الحكومة الأمريكية . وده في إطار الحرب التجارية المشتعلة بين أمريكا والصين، من بعد وصول الرئيس Donald J. Trump للرئاسة.

-جوجل شركة أمريكية وبالتالي هي ملتزمة بقرارات الحكومة، وبناء عليه أعلنت وقف تعاملها مع هواوي في بعض جوانب تعاونهم، ومن ضمنها حرمان هواوي من الحصول على بعض التحديثات لنظام تشغيل أندرويد اللي موبايلاتها معتمدة عليه.

*طيب أنا معايا موبايل هواوي، ده معناه إيه بالنسبة لي؟
-بحسب تصريحات المتحدث باسم شركة جوجل، فالأشخاص اللي بيستخدموا حاليًا موبايلات وأجهزة لوحية ماركة هواوي، لن يتأثروا إلى حد كبير، وهتفضل عندهم إمكانية تنزيل تحديثات البرامج والتطبيقات. لكنهم مش هيقدروا يثبتوا الإصدارات المستقبلية من نظام التشغيل أندرويد.

– دي مشكلة كبيرة، لإن تحديثات أنظمة التشغيل مش بس بتضيف مميزات جديدة للنظام، لكنها كمان بتعالج الثغرات الأمنية الموجودة فيه، واللي بيتم اكتشافها مع الوقت وتحديث أنظمة التشغيل لعلاجها، ومنع القراصنة من اختراق الهواتف عبرها.

– ردًا على النقطة دي، أعلن المتحدث باسم هواوي، إن الشركة هتستمر في “توفير تحديثات الأمان وخدمات ما بعد البيع لجميع منتجات الهواتف الذكية والأجهزة اللوحية الحالية سواء التي تم بيعها أو لا تزال في المخازن على مستوى العالم”، وإلى الآن مفيش توضيح هتعمل إيه بالظبط.

*لو اشتريت موبايل هواوي جديد، إيه اللي هيحصل؟ والنظام اللي شغال به هيكون إيه؟
– موبايلات هواوي الموجودة في الأسواق حاليًا بيسري عليها اللي بيسري على الهواتف اللي شغالة بالفعل.

-أما بالنسبة لإصدارات هواوي المستقبلية، فإذا الشركة ملقتش حل (سواء مع شركة جوجل والحكومة الأمريكية، أو عن طريق إصدار نظام تشغيل جديد)، فالموبيل هيشتغل أندرويد عادي لإنه نظام مفتوح المصدر مش ملك لحد، لكن مش هتلاقي عليه خدمات جوجل الأساسية زي متجر تطبيقات جوجل، والبريد الالكتروني “جي ميل”، وخرائط جوجل. وده ما لم تصل الشركة إلى حل للمشكلة دي.

*هل كده شركة هواوي هتنتهي خالص في المستقبل القريب؟
-بالتأكيد أعمال شركة هواوي هتتضرر من قرار “جوجل”، لكن الشركة أعلنت من فترة إنها بتستعد لهذا الاحتمال من خلال بناء تكنولوجيا خاصة بها لا تعتمد على عمالقة التكنولوجيا الأمريكيين. وإن لديهم نظام تشغيل خاص بالشركة هيتم طرحه في حال تم قطع خدمات الشركات الكبيرة عنها.

-حتى الآن مش معروف تفاصيل عن نظام التشغيل اللي هواوي بتتكلم عنه ولا امتى هيتم طرحه، لكن بالتأكيد هيعلن عنه قريب، لأنه هيبقي طوق النجاة ليها من الأزمة دي