دحض الإدعاء

## إعلان جديد لحالة الطوارئ في مصر

– ناس كتير استغربت من قرار الرئيس السيسي بإعلان حالة الطوارئ، وبعض الناس ربطته بنتيجة الاستفتاء. فإيه قصة حكاية الطوارئ دي؟

**إيه اللي بينظم إعلان حالة الطوارئ؟

– المادة (154) من دستور 2014 هي اللي تنظم عملية إعلان حالة الطوارئ في مصر. والمادة دي بتنص على إن رئيس الجمهورية
له حق إعلان حالة الطوارئ ويجب عرض الإعلان ده على مجلس النواب خلال الأيام السبعة التالية ليقرر ما يراه بشأنه بالأغلبية. ويكون إعلانها لمدة محددة لا تجاوز ثلاثة أشهر، ولا تمد إلا لمدة أخرى مماثلة، بعد موافقة ثلثي عدد أعضاء المجلس.

– يعني حسب المادة مينفعش رئيس الجمهورية يفرض حالة الطوارئ إلا لمدتين فقط كل مدة فيهم 3 شهور.

**طيب ايه اللي بيحصل؟
– اللي بيحصل إنه عشان ميتمش مخالفة النص الدستوري شكليًا، فبعد مرور المدتين رئيس الجمهورية بيفوت يومين أو تلاته بدون طوارئ ويبدأ فرضها من أول وجديد لمدة 3 شهور تانين، كأنها بتفرض للمرة الأولى، والبرلمان بيوافق عليها.

**هل دي أول مرة يتم فيها فرض حالة الطوارئ؟

– دي مش أول مرة يتم فيها إعلان حالة الطوارئ خلال عهد الرئيس السيسي. حالة الطوارئ أعلنت في مناطق بشمال سيناء من أكتوبر 2014، بعد هجمات إرهابية أسفرت عن استشهاد وإصابة عشرات الجنود والضباط، وفضلت تتجدد بعد كده كل 3 شهور بموافقة البرلمان.

– وحالة الطوارئ معلنة في عموم مصر، وبتجدد كل 3 أشهر، من أبريل 2017، بعد التفجيرين اللذين استهدفا كنيستي مارجرجس في مدينة طنطا ومارمرقس في مدينة الإسكندرية.

– آخر مرة أعلنت فيها حالة الطوارئ كانت في 15 يناير اللي فات. وحالة الطوارئ انتهت يوم 15 أبريل الحالي، ويبدو إن كان في رغبة لعدم إجراء الاستفتاء على التعديلات الدستورية في ظل حالة الطوارئ، عشان كده تم تأجيلها لما بعد الانتهاء من الاستفتاء.