دحض الإدعاء

– بعد الانتقادات الكثيرة لأسعار تذاكر مباريات مصر في بطولة أمم أفريقيا، واللي على إثرها بيفكر EFA.eg مراجعتها تاني. موقع اليوم السابع نشر النهارده تقرير بيتكلم فيه عن “الحقائق الغائبة فى ملف أسعار تذاكر مباريات المنتخب فى الكان”، بيبرر فيه أسعار تذاكر مباريات المنتخب في كأس الأمم الأفريقية، واللي هتتراوح بين 200 و2500 جنيه.
اليوم السابع
– التقرير بيتكلم عن إن كرة القدم بقت من أهم مصادر دخل الدول، وبيقارن بين أسعار تذاكر الماتشات في مصر وتذاكر الحفلات الغنائية والسينما والمسرح، وبيقول إن أسعار تذاكر المباريات طول السنين اللي فاتت ما بين 10 جنيهات إلى 50 جنيهًا في حين وصلت قيمة تذكرة السينما مؤخرا إلى 150 و250 جنيهًا، ونفس الأمر بالنسبة للمسرح تتراوح أسعار تذكرته بين 100 إلى 400 جنيه، وإن الحفلات الغنائية الكبرى لنجوم الطرب،بتصل فيها سعر تذكرة إلى 1000 جنيه وبحد أدنى 300 جنيه.
Total Africa Cup of Nations
– رغم إن الكلام ده يبدو حقيقي ، لكنه مضلل وبيتجاهل حقايق تانية مهمة. كرة القدم فعلًا صناعة ضخمة بمليارات الدولارات ومهمة، لكن لما بيكون في بطولة دولية كبيرة، فالبلد المستضيف لازم تدعمها.

على سبيل المثال، بطولة كأس الأمم الأسيوية اللي كانت في الإمارات يناير اللي فات، أسعار التذاكر كانت دور المجموعات بـ25 درهم يعني زيهم زي 25 جنيه هنا في مصر واللي هما في الأخر 115 جنيه مصري، أما النهائي فكان 75 درهم بس!، مع الأخذ في الاعتبار الفرق بين دخل الفرد في الإمارات ومصر.
Asian Football Confederation
كمان بطولة كأس العالم للأندية اللي اتلعب في ديسمبر اللي فات في الإمارات، سعر تذاكر الدرجة التالتة في مباريات فريق العين “ممثل الكرة الإماراتية في البطولة” كان 25 درهم، واللي هما حتى لو حولناهم لجنيه مصري = 115جنيه. وعشان تحضر النهائي كنت هتدفع 100 درهم بس، اللي هما هنا في مصر 100 جنيه يعني! طبعًا إحنا هنا متكلمناش عن الفارق بين ملاعب الإمارات الفخمة اللي فيها خدمات ممتازة وبين ملاعب مصر اللي خدماتها متواضعة بالمقارنة بنظيرتها الإماراتية.
FIFA Club World Cup
ونروح بعيد ليه؟ خلينا هنا في أفريقيا، ونتكلم عن نفس البطولة كمان. النسخة اللي فاتت من كأس الأمم الأفريقية واللي اتلعبت في الجابون، كان سعر أقل تذكرة في البطولة بـ80 سنت يعني أقل من دولار يعني أقل من 17.5 جنيه مصري!

كمان في كأس العالم للشباب اللي نظمتها مصر سنة 2009، وكانت أخر بطولة دولية كبيرة تنظمها مصر، أسعار التذاكر كانت الدرجة الثالثة 5 جنيهات والدرجة الثانية 30 جنيها والعلوى 50 جنيها والدرجة الاولى مائة جنيه ، وبالمناسبة كان المهندس هاني أبوريدة رئيس الاتحاد الحالي هو رئيس اللجنة المنظمة للبطولة، وقال إن “البطولة ستفرض اثارتها وتحظى بالمتابعة خاصة مع أسعار تذاكر المباريات المتاحة للجميع”.

في إطار التبرير لسعر التذاكر المرتفع، قالت اليوم السابع، إن سعر تذكرة السينما أو المسرح أو حفل الفنان الفلاني، لكن محدش بيقول إن الحفلة أو الفيلم ده عمل خاص منتج بفلوس خاصة صاحبها بيسعى يلمها ويكسب منها وإن أغلب مكسب الفيلم أو الحفلة بييجي من التذاكر اللي بتتباع، لكن لما يكون في منتخب بيمثل الدولة فالأمر مختلف، لأن الدولة كلها مستفيدة. الدولة مستفيدة بالترويج والدعايا لاسمها كدولة مستضيفة لبطولة عالمية، وبتستفيد من نشاط السياحة والحركة الاقتصادية اللي بتصاحب البطولة.

كمان لو حابين نكسب من البطولة بزيادة، ففي رعاة للبطولة بيدفعوا فلوس آاااد كده عشان يعلنوا عن منتجاتهم خلالها وخلال المباريات، ليه المواطن الغلبان هو اللي يتحمل التكلفة؟ وليه منروحش لشركات كبيرة ونعرض عليها تحط اسمها وشعارها على تذاكر المباريات في مقابل مبالغ مالية؟ وغير كده طرق تانية كتير.