دحض الإدعاء

– بداية من وقت ما وزيرة الصحة طلعت قرار إذاعة السلام الوطني في المستشفيات الحكومية، وهيا بيتنشر على لسانها كلام غير صحيح.

– لما فتحنا الخبر المتداول، لقينا إنه منشور من يومين على موقع اسمه “نبض الحرية”، وهو دايما بينشر شائعات.. وبعدها بدأت بعض الصفحات تشير الخبر أو صورة منه بشكل كثيف.✅✅

– في داخل الخبر “المنشور من يومين”، نسب الموقع الكلام للوزيرة على أساس إنها عملت مداخلة مع الإعلامي عمرو أديب، اللي مفروض ترك قناة “أون تي في” من فترة، ورايح قناة “إم بي سي”، حسب ما تم الإعلان عن ده رسميا في 7 يونيو الماضي.. وعمرو حتى الآن ما بدأش شغله في القناة الجديدة، فإزاي هيتعمل معاه مداخلة “من يومين”.

– عنوان الخبر كمان بيقول “بالفيديو”، ولما شوفنا الخبر مكنش فيه فيديو للمداخلة الهاتفية بحيث يأكد الكلام المنسوب للوزيرة.
– ركزنا في ملابس الوزيرة عشان نعرف في أي وقت كانت بتتكلم، اتضح إن صورة الخبر متاخدة من فيديو اتكلمت فيه بعد حضورها اجتماع المجلس الأعلى للجامعات في 23 يونيو الماضي.. وكانت وقتها بتشيد بالتعاون بين وزارة الصحة والجامعات المصرية ومتكلمتش عن حاجة تانية.