دحض الإدعاء

– الكلام ده غير صحيح. الصورة حقيقية مش ملعوب فيها ولا حاجة. في 3 صور من زوايا مختلفة للجندي وبيظهر فيها وهو بيبيع الخضار، ما يؤكد إن الصورة حقيقية، كمان مفيش صور شبيه من نفس المكان نقدر من خلالها نشك إن صورة الجندي متركبة مكان بائع تاني مثلا.✅✅

– المكان اللي المجند قاعد فيه ده بيقع أمام قسم مرور الكيلو 21 بالإسكندرية، وبجوار مستشفى مبرة العصافرة، وهو مبنى شهير جدًا في المنطقة مبني على الطراز الإسلامي، ومؤخرًا وضعت عليه يافطة مكتوب عليها “محافظة الإسكندرية.. حي العجمي.. رئاسة قطاع أبو تلات قبلي.. مكتب الإتصال الجماهيري”.✅✅

– كمان لو اخدنا بالنا المخرج تامر الخشاب لما حاول يثبت إن الصورة مفبركة، ووضع مكان الجندي شخص يرتدي جلباية، ثم شال الجندي خالص وساب مكانه فاضي، كدليل إن اللعب في الصورة عملية سهلة، كانت الصور اللي عملها واضح إنها مفبركة ومش طبيعية إطلاقًا مقارنة بصورة الجندي اللي كانت طبيعية.

– دي مش أول مرة يظهر فيها جنود بالجيش وهما بيبيعوا منتجات غذائية. في صور وفيديوهات كتير تخص الموضوع هنترك بعضها في الكومنتات.