دحض الإدعاء

## خوفا من السرطان.. سحب ٢١ دواء من الصيدليات

– وزارة الصحة المصرية أصدرت امبارح قرار بسحب الأدوية المحتوية على الرانيتيدين، وعلى رأسها دواء زانتاك بتاع الحموضة وقرحة المعدة المعروف. القرار ده خوف ناس كتير بعتت لنا عايزه تعرف حقيقة الموضوع ده ⬇️⬇️

بداية التحذير:

– هيئة الغذاء والدواء الأمريكية أصدرت من 6 أيام تحذير من الأدوية اللي بتحتوي على مادة الرانيتيدين، وعلى رأسها الدواء المعروف تجاريًا باسم زانتاك.
U.S. Food and Drug Administration
– هيئة الدواء قالت إنها رصدت في بعض أدوية الرانيتيدين شوائب بنسب منخفضة من مادة “NDMA” اللي بيتم تصنيفها كمادة مسرطنة محتملة. وإنها مازالت بتبحث إذا كانت المستويات دي بتسبب خطر على صحة المرضى ولا لأ.

-مادة “NDMA” دي ملوث بيئي معروف بيوجد بمستويات منخفضة جدًا في الماء والأطعمة، بما في ذلك اللحوم ومنتجات الألبان والخضروات. وهي مادة بتستخدم في المعامل لإحداث التحولات السرطانية في أنسجة بعض حيوانات التجارب، من أجل أهداف بحثية.

– هيئة الغذاء والدواء الأمريكية قالت إنها لا تدعو الأفراد إلى التوقف عن تناول رانيتيدين في هذا الوقت؛ ومع ذلك، قالت إن يجب على المرضى الذين يتناولون أدوية فيها رانيتيدين (زي زانتاك) بوصفة طبية وعاوزين يوقفوا استخدامه إنهم يرجعوا لأطبائهم عشان يكتبوا لهم أدوية تانية.

-وكمان نصحت الناس اللي بياخدوا زانتاك وغيره من الأدوية اللي فيها رانيتيدين إنها تاخد أدوية تانية بديلة تؤدي نفس الغرض.

*قرار وزارة الصحة:

-وزارة الصحة المصرية بادرت وأخدت قرار بسحب كافة الأدوية اللي بتحتوي على الرانيتيدين بكل الأشكال الصيدلانية والتركيزات، وأصدرت نشرة فيها أسماء 21 دواء فيهم المادة دي، أبرزهم زانتاك وفوار راني ورانيتيدين ورانيتاك وإبيرانت. (صورة من النشرة في أول كومنت)

-الوزارة قالت كمان إنها هتسحب عينات من مادة الرانيتيدين من جميع المصانع المنتجة لتحليلها للتأكد من عدم وجود شوائب بها.