مجتمع التحقق العربي
هو منظمة بحثية غير ربحية معنية بدراسة الأخبار الزائفة والمعلومات المضللة باللغة العربية على الانترنت، وتقديم الحلول الرائدة والمبتكرة لرصدها
لماذا تسير الأغنام في حركة دائرية لأيام متواصلة في الصين؟
Nov. 29, 2022
(تحقيق- الحقيقة فين- اعرف- سين وجيم- تقارير- علشان محدش يضحك عليك- مدونة- والمواد المتشابهة في المنصات الشريكة)
دحض الإدعاء
في الفترة الأخيرة انتشرت فيديوهات لأغنام تسير في حلقة دائرية لمدة 12 يومًا بدون توقف، في منطقة منغوليا، في الصين. وطبعًا الظاهرة الغريبة دي أثارت الجدل والخوف والذعر.
المزرعة اللي حصلت فيها الظاهرة دي، هي الحظيرة رقم 13 في مزرعة فيها 34 حظيرة. الموضوع كان غريب حتى للعلماء نفسهم اللي عجزوا عن تفسير الظاهرة دي بشكل علمي قاطع، لأن الأغنام كانت بتلف مع عقارب الساعة 12 يوم متواصلين.
القصة دي بدأت بعدد قليل من الأغنام، وبعدها باقي الأغنام انضموا ليهم.
## التفسير الأول:
- بعض العلماء قالوا إن المزرعة دي فيها مرض انتشر بين الأغنام، وهو ده السبب في إنهم يتحركوا في دواير كده. المرض ده معروف واسمه "داء الليستريات"، وهو داء يصيب البشر والحيوانات، ومعروف باسم "داء الدوران".
- الليستيريات هي بكتيريا تعيش في أمعاء الأغنام ويمكنها البقاء والتكاثر في التربة والمياه والسماد والأعلاف، والبقاء على قيد الحياة لمدة تصل إلى 5 سنوات، لأنها شديدة التحمل مقارنة بأنواع البكتيريا الأخرى.
- من علامات المرض ده هو الدوار، ويصيب جانب واحد من دماغ الحيوان، وده اللي بيتسبب في الميل نحو الجانب المصاب، اللي بيوصل أحيانا إلى الشلل. وفي حال تفشي المرض تتأثر به عادة نسبة قليلة فقط من الأغنام، وتميل إلى اتباع سلوك الدوران.
- الحيوانات المصابة بالمرض ده بتفشل أحيانًا في القدوم إلى حوض العلف، وتكون مكتئبة ومشوشة وقد تدفع نفسها إلى الزوايا والأسوار أو تحت البوابات وأحواض التغذية، كمان بتبقى هزيلة وضعيفة، وبتضطر تتكئ على الأشياء بسبب مرضها.
- طبعًا بسبب الحالة دي، هيبقى من الصعب إن الأغنام تدور 12 يوم متواصلين، وده اللي خلى التفسير ده يترفض لأنه "غير واقعي"، وفقا لأندرو فيشر، أستاذ طب إنتاج الماشية والأغنام في جامعة ملبورن في استراليا، في تصريحه لموقع abc news الأسترالي
-"فيشر" قال إن إصابة الاغنام دي بمرض الليستريات مستبعد، لأنها تسير في دائرة منتظمة لها مركز، في حين إن الحيوانات اللي بتصاب بالمرض عادة لا تدور بشكل متحد إلى هذه الدرجة، ده غير إنها بتظهر عليها حالات عصبية أكثر من كده.
## التفسير الثاني:
- بعد رفض التفسير الأول، بعض العلماء لجأوا لتفسير آخر، وهو إن الظاهرة دي بسبب حالة نفسية بتحصل للأغنام اللي اتعودت تعيش في أماكن مغلقة أو أعشاش صغيرة تتحرك داخلها في مساحات ضيقة.
- الأغنام لما بتخرج برة الأماكن الضيقة دي وتروح مكان أوسع بيفضلوا يتحركوا بنفس الطريقة، وبتبدأ الحالة دي مع أول حيوان بيخرج من المكان المغلق فباقي الحيوانات بتعمل زيه.
- العلماء قالوا إن دي نظرية القطيع، والدليل إن مجموعة صغيرة في الحظيرة 13 بدأت تمشي كدا، وانضم لهم باقي القطيع.
## التفسير الثالث:
- مواقع علمية زي "ساينس أليرت" قالت إن سلوك الأغنام يمكن أن يكون بسبب دخولها دوامة الموت، اللي بتحصل للنمل أحيانا.
- الدوامة دي بتحصل للنمل العسكري لما بينفصل عن بحث المؤن وبيفقد مسار السرب، فبيدأ باتباع بعضه في حركات دائرية بتؤدي في النهاية لموته بسبب الإرهاق والجوع.
آخر الأخبار
