دحض الإدعاء

النهاردة وزارة التربية والتعليم أعلنت عن تفاصيل جديدة بخصوص بداية العام الدراسي الجاي، ونظام التعليم الجديد. وعشان بتجيلنا أسئلة كتير عن الموضوعات دي، هنقول التفاصيل الجديدة باختصار.👇👇

**الدراسة هتبدأ امتى وهتخلص امتى؟

مش كل الطلاب هيبدأو الدراسة ويخلصوها في وقت واحد. الموضوع هيبقى متقسم كالتالي:

رياض الأطفال وأولى ابتدائي: هيبدأو في 1 سبتمبر 2018، وهيخلصوا في 30 مايو 2019.

من 2 ابتدائي إلى 3 ثانوي: هيبدأو في 22 سبتمبر 2018، وهيخلصوا في 6 يونيو 2019.

والمواعيد دي تشمل جميع مراحل التعليم المختلفة، للمدارس الرسمية، والرسمية للغات، والخاصة، والخاصة للغات.

**إيه آخر أخبار نظام التعليم الجديد؟

– المجلس الأعلى للتعليم قبل الجامعي وافق بشكل نهائي خلاص على مشروع نظام التعليم الثانوي الجديد بنظام التقييم على ثلاث سنوات، يعني تقييم الطلاب في الثانوية العامة هيكون على مجمل الـ3 سنين كاملين.

– نظام التعليم الجديد هيكون متقسم لأدبي وعلمي بس، وهيتلغي تقسيم علمي علوم وعلمي رياضة سواء في أولى أو تانية أو تالتة ثانوي. الكلام ده بالنسبة للطلبة اللي لسه داخلين أولى ثانوي السنة الجاية، أما اللي داخلين تانية أو تالتة ثانوي فنظامهم ماشي زي ماهو.

– مواد (تطبيقات رياضيات للصف الثانى الثانوي- مبادئ التفكير الفلسفي والتفكير العلمى للصف الأول الثانوي -التاريخ للصفوف الأول والثاني الثانوي- الجغرافيا للصفوف الأول والثاني الثانوي) هتدرس كمواد مستمرة على مدار العام زيها زي مواد العلوم بالظبط.

– بيتم حاليًا تصنيع مليون تابلت لطلاب ومعلمي الصف الأول الثانوي عشان يستلموها في بداية العام الدراسي الجديد.

– هيتم تزويد 2530 مدرسة على مستوى الجمهورية، بسيرفرات فيها المواد التعليمية، وشبكة إنترنت داخلية فائقة السرعة، يستفيد منها الطلاب مجانًا.

الامتحانات هتكون على مستوى المدرسة، يعني كل مدرسة امتحانها هيكون مختلف عن التانية. والتصحيح هيتم عن طريق الكمبيوتر بدون تدخل بشري.

**هل في جديد بخصوص التعليم الفني؟

– مدارس التعليم الفني الجديدة هيبقى اسمها “مدارس التكنولوجيا التطبيقية”.

– نظام التعليم الفني الجديد هيكون فيه سنة لإعداد الطلاب قبل الدراسة، لتأهيلهم لغويًا وتربويًا ومهاريًا بعد الحصول على شهادة إتمام مرحلة التعليم الأساسي.