دحض الإدعاء

– فصل القول، الكلام ده كله غير صحيح، وقبل ما نوضح ليه ده غلط، حابين نقول إننا تواصلنا مع رامي عباس، وكيل محمد صلاح، وسألناه عن مدى صحة القصة فقال إنها “Fake” أو مزيفة.✅✅
– لما راجعنا الموقع ناشر إعلان المنحة وجدنا إن تاريخ تسجيل الدومين الخاص به 20 مايو الماضي (يعني توقيت حديث)، واللى هيفضل شغال لمدة سنة بس، ربما حاول الاستفادة من الصدى والشعبية اللى تمتع بيها صلاح عربيًا وعالميًا.

– في داخل إعلان المنحة أو الابليكيشن مفيش أي روابط أو إيميل يمكن التقديم من خلاله على المنحة، ورغم ده برضو اتشير أكتر من 10 آلاف مرة على فيس بوك.

– الموقع بيستخدم قالب “ورد برس” شكله بدائي جدًا، يمكن الاستعانة بالقوالب الجاهزة اللى بتوفرها “ورد برس” لأي حد ممكن يستخدمها بسهولة. وكان أول بوست ليه في 20 مايو برضو بعنوان “Hello World”.

– واحنا بندور على أصل القصة لاقينا موقع تاني ناشر نفس إعلان المنحة بنفس النص، وكان أول موضوع ليه برضو “Hello World”.. لكن اتضح انه الدومين بتاعه اتعمل بعد الأول بـ 16 يوم في 6 يونيو.

– لاحظنا كمان إن إعلان المنحة المزيف انتشر بشكل كبير على فيس بوك، وناس كتير من إفريقيا وآسيا صدقته وشيرته بكثافة قبل ما يوصل مصر النهاردة.

* صلاح معروف بأعماله الخيرية لكن معندوش مؤسسة خيرية.. وهو كمان نشط جدا على السوشيال ميديا، يعني لو كان فيه منحة بجد كان هيبقى أول واحد يشير إعلانها ويتكلم عنها.. وده محصلش.

* دي مش أول مرة يتم استغلال اسم صلاح في النصب على الناس.. من شهرين في إسكندرية مكاتب البريد اتملت بالطوابير لشراء استمارة بـ 20 جنيه، للحصول على منحة محمد صلاح المالية، ووقتها هيئة البريد نفت القصة.